Shillong, Naiwieng 06
Ha ka step jong ka sngi Palei ha ka por kumba 8 baje eiei mynstep, sa shisien la mih biang ka jingïapynibor hapdeng ki pulit bad ki dkhot ka Meghalaya Commercial Truck Owners and Drivers Association (MCTODA) ha kaba ki pulit ki la pyndonkam da ki bom pynsat khmat ban pynpra ïa ki dkhot ka MCTODA.
Kane ka la jia hadien ba ki dkhot ka MCTODA, kiba dang pynlong ïa ka jingïakhih ha Mawryngkneng, ki la pakhang lynti ïa ki trok kiba kit dewbilat bad clinker ba la synran da ki bor pulit, kumta ki dkhot ka Association watla khlem ki nongïalam, ki la pakhang ïa kitei ki trok bad kane ka la wanrah ka jingsiat ‘tear gas’ biang da ki pulit.
Namarba ka la mih ka jingïapynibor bad ka jingïania kaba jur hapdeng ki dkhot ka MCTODA bad ki pulit ki la pyndonkam da ki bom pynsat khmat ban pynpra ïa ka jingïalum ki dkhot ka association.
Na ka jingmih ka jingjia shah bom lathi bad siat ‘tear gas’ da ki pulit ïa ki trai bad nongñiah trok kiba don hapoh ka shatri ka MCTODA, kala pynbitar ïa ki longkmie kiba im da kaba buh dukan hajan katei ka jaka bad kynnoh ba ka huri-hura baroh ka mih na ka jingleh donbor ki bor pulit.
Shuh-shuh ki la pynpaw ïa ka jingbitar halor ka nongrim bad jingsngew jong ki, ba ka jingwan ki pulit ka pynthut ïa ka suk ka saiñ ha shnong ha thaw bad wanlam pat ka huri-hura kumba long ha ka step synñia jong ka 5 tarik Naiwieng 2025.
Katkum ka lyngkhot durkhih (Video) ba la saphriang ha ki rynsan social media bapher-bapher la sakhi ba ki longkmie jong ka thaiñ Mawryngkneng ki la kyrshan ïa ka MCTODA bad beh ïa ki Pulit ban mih na katei ka jaka bad ong ba kin leit sha ki thaiñ ‘Border’ (khappud).
Ki longkmie ki la ong ba kim tip ïa ka jingïakhih hynrei ki pulit kim dei ban pynthud ïa ka shongsuk shongshngaiñ ki nongshong shnong bad ka jingsiat ‘tear gas’ ka la pynsyier ïa ki khyllung khynnah bad ka lyer ha katei ka jaka ruh kam long shuh bad ka la pynsohsat ïa ki briew ban ring ne pynhiar mynsiem.
Halor kane, u Sordar ka Shnong Mawryngkneng u Bah Peter J Lawai u la pynrem jur ïa ka jingleh bor jong ki pulit bad ka Sorkar ka Jylla pyrshah ïa ki nongïakhih ka MCTODA ban thombor khlem jingsalia.
Haba ïakren bad u nongthoh khubor u la ong ba na ka liang ka shnong ka ai ïa ka jingkyrshan ïa ka MCTODA ba ki dawa ïa ka hok halor ka nongrim kaba khlaiñ na ka bynta ba kin ïoh bylla.
Haba ïadei bad ka jingjia kaba la jia ha ka shiteng synñia jong ka 5 tarik Naiwieng, u Sordar u la ong ba ki nongsynshar hi ki ïuh roit ïa ka hok ki nongbylla, ba rit ba ria.
Shuh shuh u la ong ba lada ka Sorkar kan dang bteng ban pyni bor, na ka liang ka shnong kam banse ban mih shakhmat ban ai ka jingkyrshan ïa ki ïakhih hapoh ka jingïalam ka MCTODA ban mih paidbah ban pyrshah ïa ka Sorkar.
