Shillong, Naiwieng 06
U MLA ka Mawryngkneng Konstituensi, u Bah Heavingstone Kharpran u la pynrem jur ïa ka jingleh jong ki pulit khlem salia pyrshah ïa ki nongïakhih.
Kane ka jingjia ka dei kaba la jia ha ka 5 tarik u Naiwieng 2025, ha ka por shiteng synñia, ha kaba ki kynhun ka Meghalaya Commercial Truck’s Owners & Driver’s Association ki la don katto-katne ngut kiba la mynsaw na ka jingshah ka wang da ki tyndong lyer pynsat khmat bad shah bom lathi.
U Bah Heavingstone u la ong, “Ka jingleh jong ki pulit khlem jingsalia ban kawang da ki tiar pynsat khmat wat hapdeng ka jinglynñiar ki longkmie, ki khynnah ruh kumjuh. Kane ka la long ka kam kaba pyntriem bad pynsyier ïa ki nongshong shnong ka Mawryngkneng”.
U la ong ruh ba kane ka jingïakhih ki khynhun ka MCTODA, ka long kaba jai-jai, kaba suk ba saiñ, ym ban don ka jingthmu ban pynkheiñ ïa ki kyndon jong ka aiñ.
Nalor kata, u ong ba haba ïoh ban ïakren bad uwei na ki dkhot ka kynhun MCTODA u la ïathuh ba ki pulit ha ka step jong ka 06 tarik ruh ki la siat biang da ki tyndong lyer pynsat khmat, la katno sien shuh.
Kumta u Bah Heavingstone u la kyntu ïa ka Sorkar ban shimkhia ban khot ïakren bad ban pynbeit noh ïa ki jingdawa jong ka kynhun MCTODA kaba la slem bha. “Ka lah ban ktah ïa ka ïaid ka ïeng bad ka shnong ka thaw jong ka Mawryngkneng da ka jingïakhih jong kane ka kynhun. Nga la kyrpad ruh ïa ka MCTODA ba kin ïakhih da kaba jai-jai,” la ong u Bah Heavingstone.
Haba kylli, u Bah Heavingstone u la ong, “Nga sngewïahap ïa ka jingong jong ki nongshong shnong ba ki pulit ki la leh be-aiñ bad leh donbor, namar ba kim shym la burom ïa ka shnong bad ïa ki paidbah”.
U Bah Heavingstone u la ong ruh ba ki pulit ki dei ban long kiba tyngkan, ban shu thombor ïa ki paidbah kiba lui-lui.
