Nongstoiñ, Naiwieng 06
Ka Sur ki Nong West kala pynrem jur ïa ka jingleh jong ki pulit pyrshah ïa ki dkhot jong ka MCTODA bad ïa ki nongshong shnong jong ka Mawryngkneng khlem da kheiñ shuh wat ïa ki kynthei bad ki khynnah khyllung.
Ki nongai ktien jong ka kynhun ba kynthup ïa u Bah Willstone Sohshang bad u Bah Wanteibok Lyngdoh ki la ong, “Kane ka jingleh donbor pyrshah ïa ka jingïakhih ba jai jai ka long pyrshah ïa ka riti synshar paidbah”.
Shuh shuh ki la bynrap ruh da kaba ong, “Ki pulit ki dei ha ka jingshisha ban peit ïa ka bha ka miat ban pynïaid beit ïaid ryntih ïa ki aiñ ki kanun hynrei balei pat ki kylla long kum ki nongthaw jingklumar bad kynnoh lane pharep bad kem ïa ki nongïakhih, kane ka paw pyllein ba ka dei tang ka buit poh ban pynpjah jubor ïa ka jingïakhih”.
Shuh shuh ki la ong ruh ba ka Sur ki Nong West ka dawa ïa ka Sorkar ba ka dei ban tuklar noh mar mar bad ban ai noh ïa ka jingdawa jong ka MCTODA namar ka long kaba shongnia kata lada ka Sorkar ka dei hok ka Sorkar jong ki paidbah nongshong shnong ka jylla Meghalaya.
U Bah Willstone Sohshang bad u Bah Wanteibok Lyngdoh ki la ong ruh ba “Ngin ïeng ha la ki jong ki kjat lada ka Sorkar ka peit lem ïa ngi, hynrei kane ka rukom leh ka paw pynban ba ka khñiot kylla ïa ka bylla ka sngi jong ki paidbah.”
Shuh shuh ki la ong ruh ba ka Sur ki Nong West ka pynrem jur ïa ki trai karkhana dewbilat kiba la nud ban leh trai khlieh khlem da burom shuh ïa ki trai ri trai muluk bad lyngba ka jingleh jong ki, ka pynkyndit bynriew ïa ki trai ri ba kumno kan jia ka longdien bad ka pateng lada ailad ïa kum kine ban wan kamai hapoh u pud u sam jong ka ri Khasi.
Ki la ong ruh ba kum ki nongshong shnong jong ka jylla ki kwah ïa ka shongsuk shong saiñ hapoh ka jylla Meghalaya hynrei ban leh ïa kata kam dei pat ban shu khang jubor ïa ka shyntur jong ki nongïakhih kiba ïakhih da ka lynti kaba jai jai katkum ka riti synshar jong ka ri.
