Shillong, Naiwieng 06
Hadien ba la rah ïa ka nam lahduh ha ka Shillong Premier League, ka Langsning FC kan khreh ban mih madan na ka bynta ban ïa aireng pyrshah ïa ka Rangdajied United FC, ha ka semi final ba nyngkong ka lympung ïalehkai SSA Super Cup, kaba la long ha ka sngi Thohdieng ha SSA Stadium, Polo ha ka por 5 baje janmiet.
Kane ka Super Cup, ka dei ka lympung ïalehkai kaba dang thymmai mynta ka snem ba la pynlong da ka Shillong Sports Association, kaba long kum shi bynta ban pynkha sa kawei pat ka kyrdan ïalehkai, ha kaba tang hynriew (top 6) tylli ki kynhun kiba la paw bad kiba khlaiñ bor na ka SPL, ki ïoh sa kane kawei pat ka kabu ksiar ba kin ïakhun.
Ha kane ka kynti, ka Lasngning FC bad ka Shillong Lajong FC, kiba long ki lahduh bad ba wan ba-ar ha ka SPL, ki la ap lypa ha ka semi-final, katba ka Rangdajied bad ka Mawlai ki la hap ban ïaid lyngba ka play-off ban poi sha ka kyrdan ïakhun jong ka semifinal.
Te kumta ka Rangdajied United FC ka la lah ban pynliem noh ïa ka Nangkiew Irat da 3-0 kol, katba ka Mawlai SC ka la pynliem ïa ka Sawmer lyngba ka tie-breaker kaba 5-4 kol.
Ha ka por ïakhun ha ka SPL, ka Langsning ka la lah ba kan pynliem da 4-0 kol ïa ka Rangdajied, bad ka dawbah kaba pynlong ïa ka ban rah ïa ka nam lahduh ka la wan hadien ba ka la ïoh ba kan khur pura 20 point haba ïa nujor bad ka Shillong Lajong FC bad ka Mawlai SC, kiba la ïoh mar 19 point.
Ka lynti ïaid jong ka Langsning ka long ba ka la lah ban khur haduh saw sien lynter ki nam jop bad ban shah rem tang shisien, te kumta ka jingïakhun ha ka sngi Thohdieng la khmih lynti ba kan long kaba itynnad.
Ha ka sngi kaba bud, ka jingïakhun semifinal kaba ar kan long hadpeng ka Shillong Lajong FC pyrshah ïa ka Mawlai SC, ha kaba la khmih lynti ba kane ka jingïakhun kan long kaba ïa biang bor bad ka ban ïakhaid bha.
Kumban shu pynkynmaw ba ha ka jingïakhun kine ki ar kynhun ha ka SPL, ka Mawlai kaba la tam shakhmat da 3-0, ka la mad pynban ïa ka nam rem da 4-3 kol ha ka Shillong Lajong, bad kane ka jingïakhun ka ïai neh sah ha ka jingmut ka jingpyrkhat jong ki paidbah kiba la sakhi ïa katei ka jingïakhun ba la lah.
Khyndiat ka ban kham pyneh mynsiem ïa ka Mawlai ka dei ha ka por ba ka ïakhun ïa ka play-off pyrshah ïa ka Sawmer, kaba hangne kum ka kynhun kan hap ba kan long kaba phikir bha bad sei bor bah lada ka thrang ban pynkut ïa ka samoi ïalehkai da ka jingjop ha ka Super Cup.
