Shillong, Naiwieng 06
Namar ka jingpynkheiñ ïa ki kyndon ïada mariang ha ka jingpyntrei ïa ka surok Shillong-Dawki, kaba lam sha ka jingjngut jong ka wah Umngot, ka Meghalaya State Pollution Control Board (MSPCB) kala daiñ da ka kuna pynjulor mariang ba T.15 lak ïa ka National Highways and Infrastructure Develop-ment Corporation Limi-ted (NHIDCL).
Ha ka shithi kaba la phah sha u General Manager (P) ka NHIDCL, u Chairman ka MSPCB u la ong, “Ka Board ka pynjari ïa ka hukum ban siew bai pynjulor mariang ïa u General Manager (P), NHIDCL, namar ki jingpynkheiñ ïa ki kyndon ba haneng, kaba long T.3,75,000 ha kawei pa kawei ka jaka, kaba kot baroh lang haduh T.15 lak.”
Shuh shuh la bthah ïa ka NHIDCL ba kan siew ïa kane ka bai pynjulor mariang hapoh ka 15 sngi na ka sngi ba ïoh pdiang ïa ka notis.
Ka MSPCB kala maham ruh ba ka jingbym kohnguh ïa ki jingbthah ka lah ban ïalam shuh shuh sha ka jingshah pynngat ha ki kyndon aiñ, kynthup ka jingsdang ban pynngat mukotduma bad kiwei kiwei ki kam kiba ïahap katkum ki aiñ kiba ïadei.
Ka MSPCB kala shim ïa kane ka lynti haba pynshong nongrim ïa ki jingshem na ka jingleit jurip kaba la pynlong ha ka 3 tarik Naiwieng, 2025. Ka kynhun jurip kala ithuh ïa saw tylli ki jaka-hapdeng ka Laitlyngkot bad Langkyrdem bad hapdeng ka Laitlyngkot bad Pynursla ïa kaba la shem ba ka don ka jingpynkheiñ ïa ki kyndon ïada mariang.
Ka jingjurip kala shem ïa ka jingtheh khyndew ha bun ki jaka, ka jingsait ïa u shyiap bad ka jingbym don ki jingker ban ïada ïa ka jingtuid ka khyndew ha kane ka projek.
Kine ki kam kila synñiang sha ka jingkylla jngut bad jingtuid ka ktieh sha ki wah ba marjan kynthup ka wah Umngot bad ki wahduid jong ka, bad ka jingkhang lynti ruh ïa ki wahduid namar ka jingtheh khyndew.
Kine ki jingleh ka NHIDCL la shem ba ki long pyrshah ïa ki kyndon jong ka Water (Prevention and Control of Pollution) Act, 1974, the Air (Prevention and Control of Pollution) Act, 1981, bad the Environment (Protection) Act, 1986.
