Patna, Naiwieng:
U Myntri ka nat ki kam pohïing jong ka sorkar pdeng bad u heh nongïalam jong ka BJP, u Amit Shah, ha ka sngi Ba-ar, u la pynpaw ïa ka jingsngewskhem jingmut ba ka kynhun NDA kan ïoh ïa ka jingjop kaba kut ha ka ilekshon sha ka ïing dorbar thawaiñ jong ka Bihar, da kaba pynskhem ba ka kynhun synrop kaba synshar kan jop “palat 160 tylli ki konstitwensi” bad kan thaw ïa ka sorkar ban wan hapoh ka jingsynshar jong u Myntri Rangbah ka Jylla, u Nitish Kumar. U la ïakob bad nud ïa u Rahul Gandhi nongïalam ka Congress ban pynlong katba lah ïa ki Yatra ban ïada ïa ki nongwan rung tuh, da kaba bynrap ba ka BJP kan beh noh ïa baroh ki nongwan buhai shnong beaiñ.
Haba ai jingkren ha ka jingïalang ha Bettiah ha West Champaran, u Shah u la kynthoh tyngeh ïa ka seng RJD ba la ïalam da u Lalu Prasad, da kaba ong ba ki la pynmih ïa ki jingpyrta kum ‘Shahabuddin amar Rahe’ bad ki thmu ban wanrah ïa ka jingsynshar riewkhlaw, hynrei ka Bihar kan ym ailad ïa kata.
U la ong, “Ka Champaran ka dei ka sakhi ba kumno ka jaka jong ka Bihar ka dang sah snam ha ka por jong ka jingsynshar riewkhlaw, jong ka RJD. Kumno ki briew kin map ïa kine ki briew kiba la pyllait ïa ka jingsynshar jong ka jingma ha kylleng ka jylla ha ka por jong ka jingsynshar jong u Lalu bad ka Rabri Devi.” U la ong, “Ka NDA kan jop 160 tylli ki konstitwensi ha Bihar, kan thaw ïa ka sorkar da ka jingbun paid kaba ar bynta na ka lai bynta,” kham mynshwa ha kane ka sngi, ha ka jingïalang ha Motihari ba marjan hapoh ka east Champaran distrik, u Shah u la ther halor ki kam saiñ pyrthei ïa ka Congress bad ka RJD, da kaba ong ba ka Sonia Gandhi ka kwah ba u khun jong ka ba un long u Myntri Rangbahduh bad u Lalu Prasad Yadav bad ka Rabri Devi ki kwah ba u khun jong ki u Tejashwi Yadav ba un long u Myntri Rangbah.
“Hynrei kam don kano kano ka kam kaba thylli ha ki kam namar ba u Narendra Modi u bat ïa ka shuki Myntri Rangbahduh bad u Nitish Kumar u shakri kum u Myntri Rangbah”, u la ong, ha ka jingkynthoh ba la buhrieh ïa ka RJD-Congress.
U Shah u la kyntu ruh ïa ki nongthep vote ba kin ñion ïa ki budam EVM ba don ‘lotus’ (ka shap jong ka BJP) khnang ban khanglad ïa ka jingwanphai biang jong ka jingsynshar riewkhlaw ha Bihar.
U la kynnoh ba ka jingsynshar jong ka RJD ka la pynsniew ïa ka jylla bad ka la pynphai biang ïa ka haduh mynta ka roi ka par ka dang don hapdeng ka jingsngewkhia bad kaba ban hap ban khmih bniah.
