Shillong, Naiwieng 06
Namar ka jingdon jong ka jingot surok najan ka surok Rhododendron Trek bad skul Gorkha, ki bor pynïaid district ka East Khasi Hills kila pynbna ban khang shipor ïa ka surok ha Upper Shillong.
Katkum ka jingpyntip u Superintendent of Police ka East Khasi Hills Bah Vivek Syiem, la ong ba ïa kane ka surok yn khang ban ïaid kali naduh ka por 11 baje mynmiet jong ka 8 tarik Naiwieng haduh ka por 5 baje mynstep jong ka 9 tarik Naiwieng.
Ha kine ki kynta, ki nongleit jingleit la bthah ba kin ïaid na kawei pat ka surok kaba ïaid na Laitkor-Pomlakrai sha 5 Mer, Upper Shillong.
Nalor kane, ïa kane ka surok yn khang ruh ban ïaid ki kali heh ha ka por mynsngi jong ka 9 tarik Naiwieng 2025. Hynrei, tang ïa ki kali emergency service yn shah ban ïaid lyngba jong ka.
