Bengaluru, Naiwieng:
Ha ka por ba ka don ka jingduna palat 50 hajar ngut ki nonghikai ha ki skul sorkar bad ki khynnah ki duna ka jingnang jingstad ba sdang ha ki sobjek ba kongsan, ka sorkar ka la rai ban pyntreikam noh da ka Artificial Intelligence ban hikai ïa ki khynnah skul ha ka Math, English bad Kannada.
Katkum ka hukum jong ka sorkar, la ïasoi ïa ka MoU hapdeng ka Samagra Shikshana Karnataka bad ka Ek Step Foundation ha Bengaluru ban ïarap ïa ki khynnah klas 4 haduh 6 ban kyntiew ïa ka jingnang jingstad jong ki ha ki skul sorkar ha kylleng ka jylla.
Dang shen, ka CIVIC, ka seng trei monsngewbha bad ka bym ïohnong, ka la ai ïa ka Report Card kaba bishar bniah ïa ka jingnoh synñiang jong ka sorkar ha ki tnad treikam bapher bapher.
Ka kaiphod jong ki ka ong, tang 34% ki khynnah skul ha ka klas 5 ha ki skul ba la pynïaid da ka sorkar ha Karnataka ki lah ban pule ïa ka jingthoh ha ka kyrdan klas 2.
Kumjuh ruh tang 20.9% ki khynnah ha ka klas 5 ki lah ban pynbeit ïa ki jingeh jong ka jingphiah. Baroh ar kine ki jingkheiñ ki kham duna shibun ban ïa ka kyrdan jong ka ri kaba long 48% ha ka jingpule bad 30.7% ha kaba pynbeit ïa ki jingeh ha ka jingkheiñ.
Uwei u heh sorkar na Samagra Shikshana Karnataka u la ong, “Ka prokram Kalika Deepa ka long ban kyntiew ïa ka jingïashim bynta jong ki khynnah skul ha ka ktien bad ka jingkheiñ da kaba pyndonkam ïa ka teknoloji ba la pynshong nongrim ha ka AI. Ngi la don jingthmu ban pyntreikam ha ki katto katne tylli ki skul ha ka jingtreikam jong ka pilot projek ha Tumakuru bad Koppal, kaba la weng bad pynduna ïa ki jingeh ha ki khynnah pule bad ban tip kham bniah ïa ki jingshem jingeh jong ki jingpule jong ki. Namar kata, mynta ka sorkar ka la nang pynïar shuh shuh ïa ki skul sha ki 1,145 tylli ha ka jylla. U Myntri Rangbah u la dep ban pynbna ïa kane ka prokram kham mynshwa ha ka mang tyngka jong ka jylla.”
Katkum ka jingong jong une u heh sorkar, ka jingpule da kaba pyndonkam da ka tiar AI jong u Ek Step ka la ïarap ïa ki khynnah skul ban nang ïa kiwei pat ki sobjek namar ba ki la jop ïa ki jingeh ha kaba pule ïa ki ktien.
Ka pisa baroh kaba la mang da ka sorkar ban pynïar ïa kane ka prokram sha palat 1,145 tylli ki skul ka long T.1,38,10,000 kaba kynthup ïa ka bai Internet, 10 tylli ki Headphone na ka bynta kawei kawei ka skul bad ka jingai jinghikai ïa ki Master Resource Person ha ka DIET bad DSERT.
Hadien ba ka DSERT ka la hikai ïa ki nonghikai ba tbit, ki hikai ïa ki nonghikai kiba ha kajuh ka por ki ïarap ïa ki khynnah skul ban pyndonkam ïa ka tiar AI ban nang ïa ka Maths, ka ktien phareng bad ka ktien Kannada. Dei ban ai ïa ka kaiphod shaphang ka jingïaid shaphrang jong ka jingpule ha ki khynnah shisien ha ka lai bnai beit beit sha ka sorkar.
Ïa kane ka prokram yn pynïar sha ki skul ha Bagalkote, Belagavi, Bengaluru Rural, Bengaluru Urban, North, Bidar, Chikkoddi, Chamarajanagara, Chikkaballapura, Chitradurga, Davanagere, Dharwad, Gadag, Haveri, Ranebennur, Hassan, Kodagu, Kolar bad kiwei ki distrik.
