Shillong, Naiwieng 07
U Bah Peter J Lawai, u Sirdar ka Mawryngkneng u la ong ba kumba paw na ka huri-hura ha Mawryngkneng ha ka jingïakhih ba khlem buh por ka Meghalaya Commercial Truck Owners and Drivers Association (MCTODA), kaba la mih hi ka paw ba ki pulit ha jaka ban long ki nongïada ki kylla long pynban ki nongthom bor bad nongpyn mynsaw ïa ki paidbah.
Ïa kane u Bah Peter u la pynpaw haba ïakren bad ki lad pathai khubor ha ka sngi Thohdieng jong ka taïew, haba pynpaw halor ka jingshah bom bad shah kem ki nongïalam ka MCTODA myn ha ka 05 tarik u Naiwieng 2025.
U Bah Peter J Lawai u la pynpaw ba ka jingai jingïatreilang ka long na ka jingïohi ba ki kyrdan nongtrei nongbylla ki shah khñiot beiñ ha kiba bat ïa ka bor synshar bad shah pynïaid ha ki heh spah.
U la ong ba ha ka jingïakren ha ka jingïalang ba la khot da u Symbud Myntri Rangbah ka Jylla, u Bah Sniawbhalang Dhar ha ka nohphai sngi jong ka 07 tarik u Naiwieng 2025, ha khmat ki Deputy Commissioner bad Superintendent of Police na East bad West Jaiñtia Hills District u la ong ba ka tnad Kam-Pohïing bad ka tnad pulit hi, ki la phiel ha ka rukom treikam jong ki bad ka Sorkar Jylla ka dei ban pdiang ïa kane.
Haba ïadei bad ka jingdawa jong ka MCTODA, ban bteng jingïakhih haduh ba ka Sorkar kan pyllait ïa u Bah Mosklandar Marngar, President lem ki nongïalam ka Association kiba la shah kem, u Bah Peter u ong ba ka long kaba shongnia namar khlem ki nongïalam yn nym lah ban pynïaid sha khmat ïa ki sienjam ïa kren.
Kumta u Bah Peter u la kyntu ïa ka Sorkar ban pyllait noh ïa ki nongïalam ka MCTODA kiba la shah kem dangshen.
