Shillong, Naiwieng
Ka Departments of Social Work bad Khasi ka Captain Williamson Sangma State University (CWSSU), Shillong Campus ryngkat ka jingïatreilang bad ka Department of Music, ka Martin Luther Christian University (MLCU) ki la plie paidbah ïa ka Raibah Living Library ha ka 1 tarik u Naiwieng 2025 ha ka shnong Raibah, South West Khasi Hills District, Meghalaya.
Ka phang pdeng jong kane ka projek ka dei, “Ka Sienjam ha ka Lawei,” kaba pynpaw ïa ka jingthmu bad ban pynim ïa ki jingtip tynrai.
Ïa kane projek la bei tyngka da ka Royal Enfield & Green Hub, kaba long shi bynta jong ka jingkitkhlieh kaba kham ngam jylliew halor ban sngewthuh bha ïa ka mei mariang, ka jingwanrah biang ïa ka jingtip tynrai bad ka jinghikai.
Ka Raibah Living Library ka ïeng kum ka jingthmu ba nyngkong eh ha ki thaiñ nongkyndong ban tip ïa ka jingmut “ki khanatang ki pynim ïa ka jingtip”, kaba pynïasoh ïa ki pateng lyngba ka jingïathuh khana, jingpynwandur bad ka jinghikai ba la don lypa.
Ha kane ka projek ki kongsan ka kynhun ki la pynlong ïa ka jingleit jngoh ïa ka Raibah Government Lower Primary School, ha kaba ki la ïakren bad ki khynnah skul bad kane ka jingsdang ka pynksan ïa ka nongrim jong ka projek ha ka jinghikai ïa ka imlang sahlang bad kane ka jingplie ka long ka dak ba pyni ïa ka jingïatreilang hapdeng ki jaka pule bad ki nongshong shnong.
Ka Meirit Wissila Snaitang bad ka Esbilin Snaitang, kiba la ai ka jingïathuhkhana haba ïadei “U Sngap Sing Syiem” uba long u nongïaleh laitluid ba pawnam jong ka jaitbyndriew Khasi, ba la pynlong ïa ki paidbah ban iohsngew ïa ka jingriewspah ka pateng bad ka ba pyni ïa ka jingbteng ban pynwandur ïa ka jingkynmaw ïa ka jinglong kyrpang.
Ka Khasi Department ka la pyni ïa ka Drama lyngkot, kaba pynkynmaw ïa ka Kolshor bad ka pule puthi. Kumjuh la pynlong ïa ki jingïalehkai tynrai kum ki ‘Nature Trails’, Mawpoint, Dienghai bad Mawkynting bad ka jingpyni ïa ka phlim ‘Documentary’ shaphang ka jingïaid lynti bad ka jingsdang jong ka Raibah Living Library bad ka TALES (Tangible Active Learning and Engagement Scaffolda).
Ha katei ka prokram la aiti ïa ki jingïatehkular ka kynhun Raibah Living Library ba kynthup ïa u Bah Batskhem Thabah, Ibarihun Majaw bad Badapbiang Dkhar sha ka Raibah Living Library Committee.
