Shillong, Naiwieng 07
Ka Hima Khyrim ha ka 07 tarik u Naiwieng 2025, ka la pyndep ïa ka lehniam leh rukom ha ka lympung shad ba la pynlong hakhmat ka ïingsad ha Smit.
Kane ka lehniam ka dei kaba la ju pynlong beit man la u snem bad ha u ne u snem ba mynta, u snem 2025 ka la sdang naduh ka 06 tarik u Naiwieng bad la pynkut pat ha ka 07 tarik u Naiwieng 2025.
Ha kane ka sngi ki la don haduh 554 ngut ki nongshad kiba la wan ban pynphuh pynphieng ïa kane ka shad jong ha Hima Khyrim kaba ju long man la u snem.
Na ki 554 ngut ki nongshad, 343 ngut dei ki kynthei bad 211 ngut dei ki shynrang.
Ha kane ka sngi la wan ban sakhi lang ruh da u Symbud Myntri Rangbah ka Jylla, u Bah Prestone Tynsong, nalor kiwei-kiwei de.
Haba kren sha ki lad pathai khubor, u Syiem ka Hima Khyrim u Pa’iem Balajied Sing Syiem u la ong ba ha kane ka sngi ki khun ki hajar jong ka Hima Khyrim bad ka jaitbynriew hi baroh kawei ki dei ban sngewsarong ïa la ka jong ka riti ka dustur bad ba ki dei ruh ban pynneh pynsah ïa ka, wat hapdeng ka jingshah tyllep ha ka juk stad ba mynta.
“Ka jinglehniam ha kane ka sngi ka la long kaba la iphuh iphieng ha kaba ki khun ki hajar ka Hima ki la wan ban ïa shimbynta ban pyndap ïa ka madan, naduh kiba shad bad kiba wan sakhi ruh kumjuh,” la ong u Paiem.
U Paiem u la ong ruh ba kane kan long ka jinghikai ïa ki longdien mandien ban pynneh pynsah ïa ka nongrim ka tynrai jong ka niam.
