Venezuelan, Naiwieng:
Ka US ka la iathuh ba ka la pynlong 13 tylli ki jinghiar thma naduh u Nailur ia ki jhad ha ki rud duriaw jong ka Venezuela bad kiba dang shen, ha ka duriaw bah Pacific ba Shatei, kaba la wanrah ia ka jigniap jong palat 60 ngut ki briew, katkum ka jingpynbna jong u Myntri ka tnat iada ri jong ka US, katba ka nang pynjur ia ka jingkynrei shipai ha ka duriaw Caribbean.
Ka US, ka la kynnoh, khlem da pyni ia ki sakhi sabut, ba ki lieng, ba ka US ka la ioh ban leit ther bom, namar ki dei ki lieng bad ki jhad khaïi droks be-aiñ kiba kit ia u droks ban pynpoi sha katei ka jaka lyngba jong katei ka duriaw, hynrei ki nongialam bar ri, ki katto- katne ki dkhot jong ka seng Congress, ki nongthaw aiñ bad kiba ha iing jong utei uba iap, ki la dawa ban pynioh ia ki sakhi sabut kiba biang ban pynshisha ia ki jingkynnoh ba la pharep da ka US.
U heh jong ka United Nations jong ka hok longbriew manbriew, u la khot ia ki jinghiar thma jong ka US ia ki nongkhaïi droks kiba la shah kynnoh ha ki rud duriaw jong ka South America bad ong ba ka long ka bym lah ban pdiang bad ka jingpynkheiñ ia ka aiñ jong ka hok longbriew manbriew ha ka pyrthei bad ka Venezuela ka ong ba ki long be-aiñ, ki long kum ka jingpyniap briew bad ki long ka jingleh donbor pyrshah ia ka ri ba laitluid jong ka South America.
U President ka Venezuela, U Nicolas Maduro, u la kynnoh ba U Donald Trump, u kwah ban pynkylla ia ka rukom synshar, katei ka jingkynnoh, kaba U President jong ka US, u la pynrit, wat hapdeng ki khubor, kiba iathuh ba katei ka sorkar, ka don ka jingiadei kaba jan bad ka liang pyrshah jong ka Venezuela.
Ha u bnai Nailur, ka US ka la tei ïa ka jingdon shipai jongka ha Caribbean – kynthup ïa ki jhad ‘nuclear’ bad ka kynhun jong ki jhad thma bapher kiba ïadon ryngkat bad ka liengsuiñ kit tiar thma kaba heh tam ha ka pyrthei, kaba la pynlong ïa u Maduro ban pynskhem ïa ki bor pahara bad ban phah da ki phew hajar ngut ki shipai ha kylleng ka ri.
Ka US, ka la kdew ia ki katto katne kiba la ngat ha kitei ki jingshah thombor, ba ki dei ki nong Venezuela, katba U President ka Colombia, U Gustavo Petro, u la ong ba kiwei pat, ki dei ki para ri jong u. Ki bahaiing jong uwei u briew na Trinidad uba la ngeit ba u la shah pyniap ha katei ka jingleit thombor jong ka US bad kumta ruh ki bahaiing- hasem jong utei uba khlad, ki la dawa ia ka jingpynshisha ba u dei u nongkhaïi drok, kumba la pharep bad shim rai hi da ka sorkar US.
