Shillong, Naiwieng 07
U Symbud Myntri Rangbah ka Jylla u Bah Prestone Tynsong haba kren sha ki nongthoh khubor ha ka sngi Thohdieng u la kyntu ïa ka seng ki nongñiah bad trai trok ban weng noh ïa ka jingïakhih jong ki bad ban wan shakhmat ban ïakren bad ka Sorkar kaba long ba la kloi ban sngap ïa ki jingeh jong ki.
Halor kiba shah kem, u Symbud Myntri Rangbah u la ong ba ka aiñ kan ïaid la ka jong ka lynti bad u la ban jur ïa ka seng ki nongñiah bad ki trai trok ba kin pynsangeh noh ïa ka jingïakhih jong ki bad ban ailad ïa ka jingleit jingwan jong ki kali ban bteng biang ban ïaid kumba ju long.
U Bah Prestone u la pyntip ba u Symbud Myntri Rangbah u Bah Sniawbhalang Dhar u ba dei khmih ïa ka tnad transport u la don ka jingïalang hapdeng ki nongïalam ka Meghalaya Truck Owners and Drivers Association, u la ong , “Ngi na ka Sorkar ngi kyrpad ïa ka seng ki nongñiah bad trai trok ban weng noh ïa ka jingïakhih bad ba kin wan shakhmat sha ka jingïakren pynbeit haba ïadei bad kane ka kam.”
Ka MCTODA ka la sdang ïa ka jingïakhih jong ka naduh ka 27 tarik u Risaw ha East Jaintia Hills bad ha ka 4 tarik u Naiwieng ki la kynriah jaka ïakhih ha Mawryngkneng ban ïai-bteng ka jingïakhih, ha kaba ha ka step synñia ka 5 tarik Naiwieng ki Pulit ki la kem noh ïa u President ka Association u Bah Mosklander Marngar, kynthup u Bah Teibor Marngar, u Bah Thrangbor Lyngdoh bad u Bah Heibor Pariat.
