Bengaluru, Naiwieng:
U Myntri Rangbah ka jylla u Siddaramaiah u la ong ha ka sngi Balang ba u Nongïalam ka liang pyrshah ha Lok Sabha, u Rahul Gandhi, u la pynpaw biang sa shisien ïa ka dur khmat kaba dum jong ka jingleh bymhok ha ka rukom jied nongmihkhmat ha ka ri India.
U Siddaramaiah u la ong ba kham mynshwa u Gandhi u la pynpaw ïa ki kam thok nongthep vote kiba heh bha ha ki konstitwensi jong ka Mahadevapura bad Aland Assembly ha Karnataka, bad mynta u la pyni ïa ki sakhi sabut ba la thoh da ki kot ki sla kiba pyni ba kumno la pyndonkam bakla ïa ka result ilekshon baroh kawei ha Haryana.
“U Chief Election Commissioner Gyanesh Kumar, uba la ïaidlait na ki jingkylli, kyntait ïa ki jingkynnoh, bad wat da kaba dawa khlem jingmut ba ki nongmudui kin da smai, u dei, la kumno kumno ha kane ka kynti, ban kiar na kaba pyrshang ban ïada ïa ki “kynrad” jong u. U la dei ban kubur ïa ka jingshisha na ka bynta ka jingïalam bakla lyngba ki rukom pyntreikam ba ïadei bad ka aiñ,” la ong u Myntri Rangbah.
U Siddaramaiah u la ong ba ki rekod ba la pyni da u nongïalam ka Congress ki pyni kumno ka tnad ilekshon ka la ïatreilang bad ka sorkar pdeng ban pynduhjait ïa ka rukom synshar paidbah kaba ka thmu ban ïada.
“Ha ka ilekshon sha ka Ïingdorbar Thawaiñ jong ka Maharashtra bad Karnataka, ka BJP bad ka Election Commission ki la thaw ïa ki nongthep vote thok da kaba pyndonkam ïa ki jingithuh jong ki nongshong shnong jong ka ri India. Hynrei ha Haryana, ki la ïaid shakhmat, wat da kaba pyndonkam ïa ka jingithuh jong ka nong Brazil na ka bynta ka jingleh thok jong ki ïa ki nongthep vote, ka jingpynshisha ïa ka jingbym don jinglehraiñ jong ki kyrdan,” la ong u Siddaramaiah.
U la kynnoh ruh ba palat 25 lak ki vote thok la thep ha ka jingthep vote sha ka dorbar thawaiñ ka Haryana.
Kiwei pat ki nongïalam ka Congress, ki la ïasnohkti lang bad u Myntri Rangbah ban kynthoh ïa ka Election Commission.
U Myntri u Ramalinga Reddy u la ong ba ka ECI ka la long kum ka sakhi kaba khlem kren ïa ka jingleh thok ha ka ilekshon kumba la kynnoh da u Rahul Gandhi.
U Myntri u Priyank Kharge u la ong ba u Gandhi u la ïai rah ïa kine ki mat da ki sakhi sabut hynrei la ïohi ba ka EC ka rieh ha lyndet jong ki nongaiktien ka seng kaba bat ïa ka jingsynshar.
“Kane ka pyni ba ka EC kam dei kaba laitluid”, u la bynrap.
