Shillong, Naiwieng 07
Ka Inter State Bus Terminal kaba don ha Mawlai Mawïong kaba dei ka jaka ïeng bos kiba wan na kiwei ki Jylla ka la sah khongreng mynta la jan dap ar snem ka ban kynjoh ha u bnai Nohprah mynta u snem 2025.
Ka jingbym wan ïeng shuh ki bos ba kit ïa ki nongleit nongwan na kiwei ki Jylla sha ISBT Mawïong ka la sdang ban sangeh naduh ba la maramot ïa ka jingkieng Umiam ha u bnai Nohprah 2023 namar ba ka la sdang ban shong synjor.
Ha kitei ki snem ba la sdang ban maramot ym tang ïa ki bos kiba heh ba la khang ban ïaid hynrei la khang ruh ban ïaid ïa ki trok namar la shah ban ïaid tang shiliang ka surok namar shiliang ka surok ki dang maramot.
Haba U Nongsaiñ Hima u la leit ban buddien biang ïa kane ka jaka ïeng bos ha ISBT Mawïong la ïohi ba ka la kynjah namar la pynïeng satang ki bos STEM bad ki bos MTC kiba dei kiba ju kit ïa ki khynnah skul.
La ïohi ruh ba ki dukan ki la khang lut, ka jaka shim pisa ruh ka la dap da ki pum-pum ha jaka ba shong namar bym plie shuh mynta la ar snem.
Ïa kane ka jaka ïeng bos ha ISBT Mawïong la mang pisa ban pynlut haduh 48.31 klur tyngka ba la bei tyngka da ka North Eastern Council bad shiphew percent la pynlut da ka Sorkar Jylla.
Hadien ba la dep, ka Sorkar Jylla ka la khot ïa u Amit Shah uba dei u myntri ka Sorkar India ba dei peit ïa ka tnad kam pohïing uba la plie ha ka 24 tarik Naitung 2023, ha jingïadonlang u Conrad K Sangma uba dei u Myntri Rangbah ka Jylla.
Watla la dep maramot ïa ka jingkieng ha Umiam hynrei ka Sorkar kam shym la shah ïa ki trok bad ki bos ban ïaid na katei ka jingkieng namar kam long shngaiñ shuh namar ba ka la rim hynrei la shah tang ïa ki kali rit.
La ïohi ba ka Sorkar Jylla ka la shna ïa ka surok thymmai na Bhoirymbong ban poi sha Mawlai By Pass ban ïaid ki bos ban ïoh pynïeng biang ha ISBT Mawïong hynrei kane ka surok haduh mynta kam pat dep lut.
Shuh-shuh la ïohi ba ka Sorkar Jylla ka la shna da kawei ka surok thymmai harum ka jingkieng Umiam ban poi sha Nongsder ban ïaid ki trok bad ki bos hynrei mynta u kontraktor u dang pyntrei shaid-shaid ïa ka jingkieng.
Lada kine ki ar tylli ki surok ba la shna thymmai ki dang slem, ka jingduhnong kan long ïa ka jaka ïeng bos ha ISBT Mawïong namar ka Sorkar ka la pynlut da ki phew klur ban shna jaka ïeng bos hynrei ka la kylla khongreng bym poi shuh ki bos.
Haduh mynta ki bos kiba kit ïa ki nongleit nongwan na kiwei ki Jylla ki don kiba ïeng hajan ka Ladumroi ha Umiam, ki don kiba ïeng ha Polo bad don kiba ïeng ha Mawdiangdiang.
