Jerusalem, Naiwieng:
Uwei u nongshah rahbor jong ka Israel, uba la shah pyllait noh ha une u Risaw ba dang shu dep, haba ai jingkren sha ki lad pathai khubor jong ka ri, u la phla ba u la shah leh khlem-akor mynba u dang don ha ka kti jong ki lehnoh Hamas ha kitei ki 2 snem tam ka jingiaid lynti jong u ha ka thma jong ka Israel bad ka Hamas. La ong ba une u long u nongshah rahbor ba nyngkong eh ban pynmih ia kitei ki jingkynnoh napdeng baroh kiba la leit phai biang sha Israel.
U Rom Braslavki, 21 snem ka rta, u la shah rahbor na Israel katba u dang iadon ha ka tamasa ‘Nova Music Festival’ kaba la long ha ka 7 tarik u Risaw jong u snem 2023, ha ka por ba ki lehnoh Hamas ki la leit thombor ia ki bynta khappud jong ka Israel bad ki la rah naphang ia ki briew na Israel katba kiba ki iakynduh ha katei ka por ka jingleit thombor jongki.
Utei u samla nong Israel, u la kynnoh ba ki shipai Hamas ki la tar lyngkhuit ia ki jaiñ jong u bad ki la shu teh ia u ha katei ka jaka ba la set ia u bad u la shah leh dusmon ruh ha uwei na kitei ki lehnoh Hamas kiba ap ia ka jaka ba la set ia u. Kumta, utei u samla u la ong ba kane ka long ka jingleh ibeiñ, ka jingpynkhlemraiñ bad ka jingpynjah burom ia ka long-rynïeng jong u.
