New Delhi, Naiwieng 07 (UNI)
U Myntri Rangbahduh ka ri, u Narendra Modi ha ka Sngi Thohdieng, u la plie ïa ka jingrakhe sah kynmaw ba 1 snem halor ka jingdap 150 snem ka jingrwai ka ri ne ‘National Song’, ka “Vande Mataram”, ha Indira Gandhi Indoor Stadium, New Delhi.
Ha kane ka jingrakhe ba i-shongkun, ka la don ruh ka jingïarwai paidbah ïa kane ka jingrwai ba pawnam, ka jingpyllait ïa ka muhor ne ‘stamp’ bad ka pisa, lem bad ki jingïashim bynta kolshor ba itynnad kiba pyni ïa ka jinglong tynrai ba riewspah jong ka ri India.
Ha ka jingkren jong u, u Myntri Rangbahduh u la ban jur halor ka jingmut kaba jylliew jong ka jingrwai, da kaba ong ba ka jingmut jong ka ‘Vande Mataram’ ka long kaba ïar bha.
“Ka ‘Vande Mataram’ kam dei tang ka jingrwai, hynrei ka dak jong ka jingïatylli, ka jingkhlaiñ, bad ka jingaiti lut jong ka India ïa ka ri lajong,” la ong u Modi.
U la batai bniah shaphang ka jingïadei kaba kynja mynsiem jong ka sha ka ri bad ka jaidbynriew: “Ka pynlong ïa ngi ban mad ïa ka jingieid kmie jong ka Ma Bharati bad ka pynkynmaw ïa ki jingkitkhlieh jong ngi kum ki khun jong ka Ma Bharati.”
U Myntri Rangbahduh u la kdew ruh ïa ka bynta jong ka jingrwai ha ka por ba ïakhun ban ïoh ïa ka jinglaitluid.
“Ha kata ka juk jong ka jinglong mraw… ‘Vande Mataram’ ka la kylla long ka jingpynbna paidbah ïa kane ka jingkut jingmut ba ka jinglaitluid jong ka India na ki kynjri jong ka jinglong mraw yn sa pynpra noh da ki kti jong ka Mei India! Ki khun jong ka hi kin long ki nongsaiñ dur ïa la ka jong ka lawei,” u la pynskhem.
Shuh shuh u Modi u la bynrap ba ka ‘Vande Mataram’ ka bat ïa ka khubor ka bym kut por na ka bynta ka ri:
“Ka ‘Vande Mataram’, watla ka long ka ‘anthem’ ki nongkyrshan jong ka jinglaitluid, ka ai mynsiem ruh ïa ngi kumno ngi dei ban ïada ïa kane ka jinglaitluid.”
Ha kane ka jingïalang la wan ïashim bynta lang ruh da ki katto-katne ki heh ki haiñ ba kynthup ïa u Myntri ka Sorkar Pdeng, u Gajendra Singh Shekhawat, u Lieutenant Governor ka Delhi, u Vinai Saxena, bad ka Myntri Rangbah ka Delhi, ka Rekha Gupta.
Kane ka jingrwai kaba la thoh da u Bankim Chandra Chatterjee ha u snem 1875, ha ka histori ka la long kum ka dak kaba khlaiñ bor jong ka jingïakhun laitluid ka India, kaba ïai bteng ban wanrah ïa ka jingsngew sarong bad ka jingïatylli jong ka ri.
