Jowai, Naiwieng 07
Ka FIFA, ka la thaw ïa ka khusnam kaba thymmai ka ban long manla u snem, kaba la khot da ka FIFA Peace Prize, ka ban sa ai ha ka sien kaba nyngkong, ha ka por ba pynlong ïa ka jingpynïakab (draw) jong ka World Cup ha u snem 2026 ha Washington, ong katei ka tnat pynïaid ïa ka phutbol ha ka pyrthei.
“Ka phutbol ka ïeng na ka bynta ka jingsuk, bad na ka bynta ki lympung ïalehkai phutbol ha ka pyrthei baroh kawei, ka FIFA Peace Prize — Ka phutbol ka pynïatylli ïa ka pyrthei kan ithuh ïa ka jingpyrshang kaba khraw jong kito ki riew shimet kiba pynïatylli ïa ki briew, kiba wanrah jingkyrmen ïa ki pateng ban wan,” la pynpaw u President ka FIFA, u Gianni Infantino ha ka kyrwoh.
Katei ka jingpynbna, ka long shwa ba u Infantino, un mihpaw ha ka America Business Forum, ha Miami, ha kaba u President jong ka America, u Donald Trump, bad u Lionel Messi, uba la pynjop ïa ka World Cup na ka bynta ka Argentina, ki la long ruh ki nongai jingkren.
Ym shym la pynpaw satia ïa u nongïoh ïa kane ka khusnam ba nyngkong, hynrei ka la don ka jingkynnoh ba ka lah ban leit sha u Trump, uba dei u paralok jong ka Infantino uba la khmih lynti ba un don lang ha ka jingïathep vote ha ka 5 tarik u Nohprah ha Kennedy Centre kaba ha ka nongbah jong ka US.
U Trump, uba la synran lang da u Infantino, u la pynbna na ka Oval Office ha u Nailar, ba ka jingthep vote, kan long ha Kennedy Centre, ha kaba u la thung ïalade mynta u snem, kum u chairman.
Naduh ba u la wanphai biang sha ka kam ha ka sien kaba ar ha u bnai Kyllalyngkot, u Trump u la kyntait ba u dei hok ban ïoh ïa ka khusnam Nobel Peace na ka bynta jong u ha kaba pynbeit ïa ki jingïakynad kiba bun ha kylleng ka pyrthei.
Hynrei u President jong ka America u la shah pynjah burom ha ka Nobel Committee jong ka Norway ha u bnai ba la dep haba ka ai ïa ka khusnam jingsuk sha ka Maria Corina Machado, nongïalam ka liang pyrshah jong ka Venezuela.
Ïa kane ka World Cup 2026 yn pynlong lang da ka America, Canada bad Mexico naduh ka 11 tarik Jylliew haduh ka 19 tarik Naitung.
