Shillong, Naiwieng 07
Ka Nongkseh SC ka la bteng ïa ka jingjop kaba phra ha ka SSA 1st Division Football league 2025, hadien ba ka la lah ban pynliem noh ïa ka Ryntih SC da 5-2 kol ha ka sngi Thohdieng ha SSA Stadium, Polo.
Ha kane ka jingïakhun ka Nongkseh ka la ïoh ban thep haduh saw kol ha ka kylla step lyngba u Khrawkupar Jana (2 & 13), Chesterpaul Lyngdoh (6) bad u Arlangky Nongsiej (45+1). Kane ka kynhun ka la thep biang sa shi kol ha ka kylla miet lyngba u Chesterpaul (61). Hynrei ka Ryntih ka la lah ban pynphai kylla ar kol lyngba u Leversharp M Syiemlieh (51 & 83) hashwa ba kan mad ïa ka jingshah rem hynriew sien ha kane ka lympung.
Lyngba kane ka nam jop ka Nongkseh ka la kamai 24 point na ka bynta ban long ka kynhun kaba khlem pat shah rem bad ban bteng ha ka ban lamkhmat ha kane ka lympung, katba ka Ryntih ka dangsah ha u laiñ jong ka jingma (relegation zone) hadien ba ka kamai tang 1 point na ki hynriew sien ïakhun.
Haba phai sha ka jingïakhun ha ka sngi Palei, ka Nongthymmai ka la pynliem noh ïa ka Mawkhar da 4-0 kol.
Kane ka nam jop ka la wan urlong lyngba ki kol ba la thep da u Daryll Lyngdoh ha ka minit kaba 21, kumjuh u Ïaikyrmen Shynret (47 & 54) uba la thep ar kol bad kawei pat da u Mowell Chyne (90+2). Hynrei ka Mawkhar haduh kaba kut ka jingïalehkai kam shym la lah ban pynphai bad ka la mad ïa ka jingshah rem kaba saw ha kane ka lympung.
Da kane ka jingjop ka Nongthymmai ka la ïaryngkat mar 14 point bad ka Mawtawar, hynrei ka la tam lyngba ka jingïapher ha ka jingthep kol.
Ka jingïalehkai ha ka sngi Saitjaiñ kan long hapdeng ka Pohkseh SC pyrshah ïa ka Lawsohtun SC ha ka por 1:15 mynsngi.
