Shillong, Naiwieng 07
Ka Rangdajied United FC ka la wanphai da ka jingkhlaiñ bor ha ka SSA Super Cup 2025 hadien ba ka la lah ban pynliem ïa ka lahduh jong ka Shillong Premier League, ka Langsning FC da 2-0 kol bad ban rung syndon sha ka final.
Kane ka nam jop ka la wan urlong lyngba ki ar kol ba la thep da u Stephanson Pale (42 & 90+1) ha ka semi final kaba nyngkong kaba la long ha ka sngi Thohdieng ha SSA Stadium kaba ha First Ground, Polo.
Kane ka SSA Super Cup ka dei kaba thymmai ba la pynlong da ka Shillong Sports Association, na ka bynta ban bynrap sa kawei pat ka kyrdan ïalehkai ka ban wanrah ka jingpynitynnad na ka bynta ki paidbah riew ïeit phutbol, ha kaba ki kynhun (Top 6) na ka SPL 2025 ki ïoh ban ïakhun ha kane ka lympung. Ka Langsning, kaba long ka lahduh jong ka SPL, bad ka Shillong Lajong kaba wan ba-ar, ki la rung lypa sha ka semi final, katba ka Rangdajied bad ka Mawlai ki la jop lyngba ka playoff ban rung sha ka semi final. Te kumta ka Rangdajied ka la pynliem ïa ka Nangkiew Irat da 3-0 kol ha ka ‘playoff’ ba nyngkong ha ka 31 tarik u Risaw hashwa ba ka Mawlai kan pynliem ïa ka Sawmer lyngba ka tie-breaker da 5-4 kol.
Ka kol kaba nyngkong ba la thep da u Stephanson ka la wan urlong lyngba ka jingïoh ban pyndei da u rangïalehkai ‘dien ka Langsning u Apborlang Kurbah bad ka la pynlong ïa ka Rangdajied ban tam da shi kol.
Ka Langsning ka la ïoh ïa ki kabu kiba biang bha ha ka kylla miet, hynrei kam shym la lah ban pynurlong, wat haba ka la wanrah ïa ki rangïalehkai shongben kum u Donlad Diengdoh bad u Samuel Phawa.
Hashwa ban wai, u Stephanson u la ïakhun tyngeh bad u la ïoh ban thep biang sa shi kol hadien ba u la lah ban pynpra ïa ki ar ngut ki rangïalehkai ‘dien bad shut beit beit sha kol ha kaba u rangapkol ka Langsning u Rajat Paul Lyngdoh um shym la lah ban pyllait na ka jingshah thep bad ka Rangdajied ka la khur syndon ïa ka jingjop.
Kawei pat ka jingïakhun semi final kan long ha ka sngi Saitjaiñ ha kaba ka Shillong Lajong kan ïakhun pyrshah ïa ka Mawlai ha ka por 5 baje janmiet. Kumba ka paw ka Lajong ka la long ka kynhun kaba khlem shah rem ha ka SPL 2025, hynrei ka la jop tang san sien bad ïakhaid saw sien. Kawei ka jingjop kaba pynsah kynmaw ka dei ïa ka Mawlai ha ka 1 tarik u Risaw. Ha katei ka jingïakhun ka Mawlai ka la lah ban tam haduh 3-0 kol, hynrei hashwa ban wai ka Lajong ka la lah ban tam kylla na ka bynta ban jop da 4-3 kol.
