Guwahati, Naiwieng:
Haba la jan ka ilekshon sha ka Sonowal Kachari Autonomous Council, ka Asom Gana Parishad (AGP) ka la pynjur ïa ka jingpynkhreh jong ka bad ka la pynbna ruh ba kan ïakhun laitluid ïa kane ka ilekshon, kaba la pynkut noh ïa ka jingïateh lok jong ka bad ka seng Bharatiya Janata Party (BJP).
Kanr ka seng ka la rai ban pynïeng kyrtong ha baroh 32 tylli ki konstitwensi jong ka Council. Kum shi bynta ban ïalap ilekshon, ka AGP ka la pynlong ïa ka jingïalang jong ki nongbud ka seng ha ka sngi Balang ha Khowang Sonowal Bhawan ha Dibrugarh distrik.
Ha kane ka jingïalang la leit ban ïashim bynta da u Vice President ka AGP Central Committee uba dei ruh u Chief Convenor jong ka Sonowal Kachari Autonomous Council Election Committee u Putul Sonowal, ki Secretary ka AGP u Sunil Rajkhowa bad u Parag Jyoti Barua, ryngkat ki katto katne ngut ki nongïalam jong ki distrik bad ki thaiñ bad ki nongbud jong ka seng.
Ha kane ka jingïakynduh ka seng ka la pynbna paidbah ïa u Jun Saikia kum u kyrtong jong ka na Khawhang konstitwensi.
Haba ai jingkren ha katei ka jingïalang, ki nongïalam ka AGP ki la kynnoh ba ka jingbamsap ka la nang kiew hapoh baroh ar tylli ki jingsynshar ka Congress bad ka BJP, kaba la khanglad ïa ka roi ka par kaba shisha jong ka Sonowal Kachari Autonomous Council.
Ki la kynnoh ba ki paidbah kiba la duh jingkyrmen ïa ka jingsynshar kaba la don lypa, mynta ki phai sha ka AGP da ka jingkyrmen kaba thymmai na ka bynta ka roi ka par bad ka jingshai.
Ha ka jingkdew, la ong ba ha ka jaka ban ïatreilang ha ka sorkar ba la lamkhmat da u Dr.Himanta Biswa Sarma, ha kaba ka seng AGP ka bat ïa ka kam myntri, ka seng ka la jied ban ïakhun laitluid marwei ha ka ilekshon jong ka Autonomous Council ha kane ka kynti, kaba pyni dak ïa ka rukom treikam ha ka saiñ pyrthei kaba thymmai ha ka thaiñ Assam.
