Tura, Naiwieng 07
U Myntri Rangbah ka Jylla, u Conrad K. Sangma ha ka Sngi Thohdieng, u la plie ïa u mawnongrim na ka bynta ban shna pynitynnad ïa u mot sah kynmaw ne ‘Cenotaph’ ha Tura, ha ka jingdon lang u Myntri Sorkar uba dei ruh u Chairman ka komiti ban pynneh-pynsah ïa ka kolshor ki Garo bad ka pateng mynbarim, u Marcuise N. Marak, Myntri ka tnad Arts & Culture, Bah Sanbor Shullai lem bad kiwei-kiwei.
U ‘Cenotaph’ ha Tura u ïeng kum ka dak ban sah kynmaw bad ban burom ïa ka jingaiti jong ki shipai Garo Labour Corp kiba la shakri ha ka por jong ka thma bah banyngkong. Kane ka projek ka thmu ban pynneh-pynsah bad pynbha ïa kane ka jaka sah kynmaw, ban pyntikna ba kan ïai bteng ban shakri kum ka jaka jong ka jingsah kynmaw, jingsarong bad jingpynpaw na ka bynta ki paidbah ka Ri-lum Garo.
Haba kren ha ka jingïalang, u Myntri Rangbah u la ong ba u ‘Cenotaph’ u dei u jingtei uba kongsan bad u ‘Cenotaph’ ha Babupara-Tura uba ai burom ïa ki Garo Labour Corp u long uba ïajan bha bad ki paidbah ka Ri-lum Garo.
“Nga pynpaw ruh ïa ka jingsngewnguh sha ki dkhot jong ka komiti hapoh ka jingpynïaid jong u Myntri, u Marcuise N. Marak, ki nongïalam niam, ki ‘riew rangbah bad ki ‘riew pawkhmat lem bad ki dkhot jong ki kynhun seng ka imlang-sahlang kiba ha kine ki khyndiat bnai ba la dep ki la ïakren bad shong jingïalang ban pynwandur haba ïadei bad ka jingtei bad jingpynitynnad ïa u ‘Cenotaph’,” u la ong.
Haba pdiang burom ïa ki longïing jong ki Garo Labour Corp ha kane ka sngi, u Myntri Rangbah u la ong ba ïa baroh ki Garo Labour Corp kiba la shakri ha ka thma-bah banyngkong yn sa ai ïa ka burom kaba dei hok ynda la dep tei ïa u ‘Cenotaph’.
“Mynta ka sngi, ngi dang shu buh ïa u maw nongrim na ka bynta ban tei pat ïa u ‘Cenotaph’ bad ynda la pyndep ïa u jingtei uba neh ha ryngkat ka jingpynwandur thymmai, ngin sa ai bad kynmaw burom ïa baroh kiba la shakri bad duh noh la ka jong ka jingim ha ki ri nongwei bad kito kiba la wanphai sha la ïing, ha ka rukom kaba biang tam na ka bynta ki jingaiti bad jingshakri jong ki,” u la bynrap.
U la kyntu ruh ïa ka komiti ban ïakynduh ïa ki bahaïing hasem jong ki Garo Labour Corp ban buh jingthoh ïa ka histori jong ka Garo Labour Corp bad bynrap, “Ka Sorkar kan ai ka jingkyrshan kaba pura ïa ka komiti ban ïaid shakhmat bad ka jingwad bniah.”
U la pynpaw ba ha ki por ba la leit noh kum ka imlang-sahlang bad wat ki jingwad bniah bad jinglum jingthoh jong ki Sorkar ruh kim pat biang bad bun ki jingtip ki la jah.
Haba pynpaw ïa ka jingsngewhun kaba khraw halor ka jingpynwandur thymmai ïa u ‘Cenotaph’, u Myntri Rangbah u la ong, “Ka jingpynwandur thymmai ka long kaba suk hynrei ka don burom bad haba ki nongwan jngohkai kin wan jngoh ïa u ‘Cenotaph’, kan wanrah ïa ka jingsngew kaba ngam jylliew bad kaba sngewkhia jong une u mot sah kynmaw.”
Shuh shuh u la ai jingmut ba kum kine ki jaka kiba kongsan ha ryngkat ka jingïarap jong ki kor teknoloji ba mynta ki dei ban don ïa ki jingtip ba la pynsaphriang sha ki nongwan jngohkai shaphang kata ka jaka ne u mot sah kynmaw.
