Thiruvananthapuram:
Kum shi bynta ban shim nuksa na ka jingïalang niam kaba heh bha ha ka thaiñ ba Shatei, ka Kerala, ka ri jong u Shankaracharya, ka dang pynkhreh ban pynlong ïa la ka jong ka Kumbh Mela, ha ka sien kaba nyngkong ha ka histori.
La ngeit ba u Shankaracharya u la seng ïa ka rukom pyntreikam ne ka Akhara System ban peit ïa ka jingpynsaphriang ïa ka niam Sanatana ha ri India ha ka bynta ba shaphang Shatei, ha kaba la pynlong ïa ki Kumbh Mela.
Ha ki bynta jong ki saw tylli ki Kumbh Mela ba kongsan, ha Haridwar, Ujjain, Nashik bad Prayagraj, ka Kerala kan pynlong ïa ka Kumbh Mela jong ka naduh ka 18 tarik u Kyllalyngkot haduh ka 3 tarik u Rymphang 2026 harud jong ka Bharathapuzha ha khmat ka Thirunavaya Nava Mukunda Temple ha Malappuram.
Yn thaw ïa ka komiti pdiang sngewbha ha ka 23 tarik u Naiwieng ban pynïadei ïa ki jinglehniam. Ka Juna Akhara, ka kynhun Monastic kaba heh tam ha ka ri bad kawei na ki kynhun ba kongsan ban pynlong ïa ka Kumbh Melas, kan peit ïa kane ka tamasa ha Kerala, ong u Mahamandaleshwar Swami Anandavanam Bharathi jong ka akhara ha ka jingïakren bad ki nongthoh khubor.
U dei tang u nong Kerala uba lai ban poi sha ka kyrdan ba kynja mynsiem kaba la kwah eh. Shisien ba u la long u nongïalam jong ka SFI ha Thrissur, u la ïakhlad noh na ka jingmut jingpyrkhat kaba wan na ka BJP. U Swami Anandavanam u la ong ba ka Kerala ka don ïa ka niam kaba riewspah kaba ïasyriem bad ka Kumbh Mela.
“Ha Thirunavaya la ju pynlong ïa ka Maha Makham ha ka por jong u Cheraman Perumal, kane ka ïaryngkat bad ka Kumbh Mela kaba la ju pynlong ha ri India”, u la ong.
“Lait na ka Thirunavaya ha Kerala, la rakhe ruh ïa ka Maha Makham ha Kumbakonam ha Tamil Nadu, kane ka tamasa ka don ka jingïadei bad ka jingmih jong u khlur Makam”, la ong u Swami Anandavanam.
Ha ka sngi Balang, u la leit jngoh ïa ka mandir Thirunavaya. Ïa ka Maha Makham la ju pynlong man la ka shiphew snem, kaba pynlong lang ïa ki nongïathuh lypa, ki riewstad, ki syiem bad ki riewshlur ban ïa pyrkhat ïa ka Sanatana Dharma. “Ha kane ka tamasa, la pyni ïa ka yanjam bad ka yagam bad la jied ïa u syiem thymmai, hadien ka jingsynshar jong u Perumal ba khatduh, u Sundara Moorthi, ka jingïalam ïa kane ka tamasa ka la leit noh sha u Perumpadappu Swaroopam bad hadien pat sha u Valluva Konathiri. Nangta ka la shim ïa ka dur kaba kham pyni kum ki jingïaleh” u la bynrap.
Ha u snem 2016, u nongïalam niam ba hakhmat eh jong ka temple Thirunavaya u la sdang ïa ki jinglehniam ha ki rud jong ka Bharathapuzha da kaba sdang ïa ka jingpynkhie im biang ïa u Maha Makham, kiba la ïai bteng lait noh tang ha ka por ba don ka khlam Covid- 19.
Ka Juna akhara mynta ka la rai ban pynlong ïa ka tamasa baheh, ka Maha Makham (Kumbh Mela), ha u snem 2028 ban pynkynmaw ïa ka jingïaid lynti kaba 12 snem ban wan.
Ka akhara kan leit sha baroh ar tylli ki Devaswom Board jong ka Malabar bad Travancore bad ban pan ïa ka jingïatreilang jong ki na ka bynta ka Kumbh Mela jong u snem 2026.
“Ki nongïathuh lypa na kiwei pat ki akhara ruh kin wan. Baroh ki nongïathuh lypa bad ki Ashram ha Kerala kin long shibynta jong kane” ong u Swami Anandavanam.
