Shillong, Naiwieng 09
U Lat ka Jylla u C.H.Vijayashankar u la ïashim bynta ha ka jingïalang “Remembering The Maestro” ba la pynlong da ka Byatikram Group ha Shillong. Ïa kane ka jingïalang la pynlong kum ka dak ka jingburom ïa u nongthaw jingrwai ba pawnam, u Sachin Dev Burman, uba la noh synniang ïa ki jingrwai ha ka ri India.
Haba kren ha kane ka sngi, U Lat haba ai jingkren ha kane ka sngi u la ong ba, ïa ka Nongbah Shillong la ju tip kum ka dohnud jong ka put ka tem jong ka thaiñ shatei lam-mihngi, kumta ka long kaba dei eh ban pynlong ïa ka jingleh burom ha kane ka Nongbah, kaba la pynmih shibun ki ‘riew donsap ha ka rwai ka tem.
U la pynpaw ba u S.D. Burman u dei uwei na ki nongthaw jingrwai ba pawnam tam, ha kaba ki jingrwai jongu, u shim jingmut na ki riti dustur jong ki briew, ka jingitynnad jong ka Mei-Mariang jong ka thaiñ.
Ha katei ka jingïalang , u nongrwai ba pawnam ka Nongbah Shillong u Bah Rudy Wallang ryngkat bad u S.D. Burman u la ïoh ïa ka ‘S.D. Burman Memorial Byatikram Lifetime Achievement Award’ namar ka jingtbit jong u ha ka rwai ka tem bad ha ka ban pynwandur ïa ka rukom rwai kane ka juk ha ka Jylla Meghalaya.
U Lat u la ai khublei ïa u bad ong ba kum kane ka jingithuh ïa ki nongrwai ka pynpaw ruh ïa ka jingriewspah jong ka thaiñ shatei lam-mihngi ha ka rwai ka tem, kaba la lah ban pynmih shibun ki nongrwai ba pawnam kynthup ïa u Dr. Bhupen Hazarika, Jayanta Hazarika, Lou Majaw and Zubeen Garg.
U Lat u la ïaroh ruh ïa ka kynhun Byatikram ïa ka jingtrei shitom jongka ban kyntiew ïa ki Jingrwai, ka Art & Culture kumjuh ruh na ka bynta ba ki la pynkup burom ïa ka pateng ki nonghikai ba khraw kiba la pynriewspah ïa ka kolshor ha ka thaiñ. Nalor kata Lat u la ai jingmut ba kin sdang ïa ka shlem ai jinghikai jingrwai (Academy of Music) ha ka kyrteng jong u nongrwai bapawnam u S.D. Burman.
U la ong ruh ba ki nongrwai ki don ka bynta ba khraw na sha lyndet ban pynsngewtynnad ïa ki nongsngap, ki long ruh kum ki nongrah khubor sha ka imlang sahlang bad ki jingrwai jongki, ka pynshlur ïa kiba bun ki paidbah ban pyrkhat ban pynpaw bad ban shim bynta.
U la pynshlur ruh ïa ki nongrwai ba dang samla ban pynpaw ïa ka sap jongki bad ban pyndonkam ïa ka jingrwai kum ka lad ban sam ïa ki khubor babha sha ka imlang sahlang ban don hapdeng ka shongsuk shongsaiñ, ka jingsngewthuh jingmut, ka jingïaryntih, ka jingdonkam ban ïada ïa ka Mei-Mariang bad kiwei ki bynta.
