Shillong, Naiweing 09
Ka Dorbar Shnong Urkaliar ka la ïoh ïa ki kor CCTV lyngba ka ‘Shillong Smart City Project’ ban pyndait hapoh ka shnong khnang ban tem ïa ki kam runar ruser bad ban wanrah jingshngaiñ ïa ki nongshong shnong bad ïa ki nongleit nongwan hapoh ka shnong.
U Secretary ka Dorbar Shnong Urkaliar u Bah Samborlang Diengdoh u la pynpaw ka jingsngewnguh ba khraw ïa ka Sorkar Jylla kaba la pynioh ïa ki kor CCTV lyngba ka ‘Shillong Smart City Project’ ka ban pynsuk ïa ka Dorbar Shnong ban peit ban khmih ïa ki jingjia bad khamtam eh ban ïoh khmih bniah ïa ka jingdheng kali na ka jingpynïeng kali khlem akor jong ki nongñiah kali ha surok.
U la buh ka jingkyrpad ïa ki nongñiah kali haba ki wan ban thied jingthied, ba kin pynïeng bha ïa ka kali jong ki, khnang ba kan ym ktah ïa ka leit ka wan jong ki paidbah, ym ban shu pynïeng kali khlem akor kat haba sngewbit namarba ka ktah bad pynthud ïa ki nongleit nongwan.
Ha kajuh ka por u la bthah ruh ïa ki nongdie jingdie kiba hapoh u pud u sam jong ka Dorbar Shnong Urkaliar ba ki dei ban khang noh ïa ki dukan jong ki hapoh ka por 11:00 baje mynmiet kumjuh ruh ïa ki kali kiba wan ïeng hapoh ka shnong hadien ka 11:00 baje mynmiet, u la ong ruh ba, ka Dorbar Shnong kan pynshitom katkum ki kyndon ba la bthah da ka Deputy Commissioner jong ka East Khasi Hills District ïa kiba ïaleh pyrshah.
U la ong ba, ka Dorbar Shnong ha ka bynta ba nongkong ka la ïoh haduh 5 tylli ki kor CCTV bad la pyndait ha ki jaka ba long kongsan eh bad ha ka bynta ba ar ka shnong kan sa ïoh sa saw tylli ki kor CCTV, “Kane ka la dei ka rukom treikam ba thymmai jong ki Dorbar Shnong, namar ka long kaba eh shibun ban shu ïa ap mit man ka mit bad ka ktah ruh ïa ka koit ka khiah, bad lyngba ka jingdon jong ki kor CCTV ka la pynsuk shibun ïa ki bor shnong ban peit ïa ka shnong ka thaw, bad kane kan long ka nuksa ïa kiwei pat ki shong” la ong u Bah Samborlang.
