Shillong, Naiwieng 09
Ki nongtrei ka kompani kaba pyntrei ïa ka surok four-lane, ki la sdang ban puh ïa ka surok kaba rim mar shu dap 11:00 baje mynmiet jong ka 8 tarik Naiwieng 2025.
Haba la dap 11:00 baje mynmiet la khang ïa ka surok ha Upper Shillong na Rhododendron Trek Road bad Gorkha School ban pom ïa ki bynta jong ka khyndew kaba dei ka surok kaba rim ban pynmadan ban pynïasnoh ïa ka surok na Laimer sha 101 Area.
Kane ka jingkhang ïa kane ka surok ban nym shah ïa ki kali ban ïaid ka dei naduh ka 11 baje mynmiet ka 8 tarik u Naiwieng 2025 haduh ka por 5 baje mynstep ka 9 tarik Naiwieng, 2025 .
Ki puh shilum mar synpoi 11 baje mynmiet ki la sdang shait shait ban pom ïa katei ka surok na skul Gorkha ban pynïasoh sha 101 Area.
Ki kali kiba ïaid ki la kham kynjah ban ïaid lyngba katei ka surok hynrei ki don katto katne kiba ïaid wat haba la tam ïa ka por 11 baje ba la buh ban khang ban nym ïaid na katei ka surok.
Ha kane ka jingpom ïa ka bynta jong u lum ha kane ka surok ban poi sha Upper Shillong la kyntu ïa ki paidbah ban pyndonkam da ka surok na Laitkor-Pomlakrai ban poi sha 5 Mer Upper Shillong.
Haduh mynta ka surok four lane ka dang bun ki bynta kiba dang sah khongreng namar lada kheiñ na Hynñiewmer, ka jingkieng kaba ïakhlad ïa ka Mylliem bad Mawngap ka dang ïaid ka jingtrei.
Ka surok kaba don pyrshah ki shipai suiñ ruh ym pat siang rong.
Ka surok najan madan phutbol Sawmer ban ïaid kiar ïa ka Laimer ka ban poi harum jaka die soh, ka kompani ka dang trei shait shait.
Kaba kham slem mynta ka dei na 101 Area haduh jingkieng Umshyrpi namar hap pyllait ïa ki kali kiba rung sha Lummawbah.
Katkum ka jingong u Bah Prestone Tynsong, u Symbud Myntri Rangbah ka jylla uba khmih ruh ïa ka tnat PWD road ha kine ki bnai ba la dep ba ka surok four-lane ban ïaid ki kali na Hynñiewmer sha jingkieng Umshyrpi yn pyndep noh hapoh u bnai Nohprah mynta u snem hynrei haduh mynta u bnai Naiwieng ka surok ka dang bun ki bym pat dep.
