Jerusalem, Naiwieng:
Ka Israel ka la ai dak ba ka lah ban pynjur ïa ki kam thombor jongka ha Lebanon, pyrshah ïa ka Hezbollah, ïa kaba u Myntri Rangbahduh ka Israel, Benjamin Netanyahu, u la kynnoh, ba ka la aitiar biang, da kaba kyntu ïa ka Beirut, ba kan weng noh ïa ki tiar ïaleh jong katei ka kynhun, kaba la ioh jingkyrshan na ka Iran.
Wat hapdeng ka jingsangeh thma ha u bnai Naiwieng 2024 bad katei ka kynhun lehnoh jong ka Lebanon, ka Israel ka dang phah pahara ia ki shipai jongka ha ki phra tylli ki bynta jong ka thaiñ Shatei Lam Mihngi jong ka Lebanon bad ka la bteng biang ia ki jinghiar thma kumba ju long man ka por.
U Myntri kam poh iing ka Israel, u Israel Katz, u la ong ba ka Hezbollah, ka ialehkai bad ka ding bad ka Israel kan sa ai da ka jubab kaba biang tam haba iadei bad kane.
U Myntri Rangbahduh ka Israel, u Benjamin Netanyahu, u la ong ba ka Hezbollah, ka pyrshang ban pynkhreh biang ialade bad ka lah ban leit thombor ia ka Israel ha kano- kano ka por bym poi pyrkhat.
“Ngi khmih lynti ba ka sorkar Lebanon kan pyndep ïa ka jingkular jongka, ban weng noh ïa ki tiar ïaleh jongka Hezbollah hynrei ka paw shai ba ngin pyndonkam ïa ka hok ban ïada ïalade hapoh ki kyndon jong ka jingsangeh thma”, la ong u Myntri Rangbahduh ka Israel.
Da ki hajar ngut ki nong Israel kiba sah hajan khappud Shathie bad ka Lebanon, ki la hap ban kynriah na la ki ïing ki sem da ki bnai hadien ba ka Hezbollah ka la sdang ban siat ‘namding sha Israel hadien ba la sdang ka thma ha Gaza ha u Risaw jong u snem 2023.
