Nongstoiñ, Naiwieng 09
Ha ka sngi Saitjaiñ jong ka taïew ka Dorbar Shnong Pyndengrei kala ïoh ban plie paidbah ïa ka ïing dorbar lane ka Dorbar Hall kaba dang shu dep tei thymmai ïa kaba la tei ha kawei na ki jaka ha Dom Thyrnang kaba hap hapoh ka dong Thadwang jong ka Shnong Pyndengrei.
Ïa kane ka ïing la wan ban plie paidbah da u MLA ka Nongstoiñ u Bah Gabriel Wahlang kum u kongsan.
Ha kane ka sngi nalor u kongsan, la don ryngkat lang u Sordar ka Shnong Pyndengrei u Bah M Marweiñ, u Secretary Shnong, ki Rangbah Dong na baroh ki dong jong ka shnong ki dkhot ka Executive Committee lem bad ki paidbah nongshong shnong Pyndengrei hi baroh kawei.
Ïa katei ka ïing dorbar la tei da ka pisa jong ka shnong ha ka jinglut kaba la kot sha ka T.1.28 klur ïa kaba la sdang ban pyntrei naduh ka 2 tarik u Risaw jong u snem 2024.
U Bah Gabriel Wahlang uba dei ruh u nongshong shnong ka Pyndengrei bad ha kajuh ka por kum u MLA ka Nongstoiñ u la pynpaw ïa ka jingkordor jong katei ka shnong, da kaba pynpaw ba ka Pyndengrei ka dei kawei na ki shnong ha Nongstoiñ Town kaba la pynmih shibun ki riew pawkhmat ha ki kam bapher bapher.
U MLA u la pynpaw ka jingkyrmen ba ka shnong kan sa lah ban pynmih sa ïa ki ophisar kiba kham heh ha ki tnat Sorkar bapher bapher bad ban pynurlong ïa kane, u la pynbna ïa ka jingthmu jong u ban buh ïa ki coaching centre ban ai jinghikai ïa ki samla jong ka shnong na ka bynta ki eksamin ïakop kum ka MCS, IAS, IPS, bad kiwei kiwei.
Shuh shuh u la ban jur ba ka shnong Pyndengrei ka dang donkam shibun ki kam pynroi, kum u MLA uba don mynta ha ka Sorkar, u la kular ban ïatreilang bad ka shnong katba lah na ka bynta ka bha ka miat jong ka shnong bad ka konstitwensi hi baroh kawei.
