Shillong, Naiwieng 09
Da ki hajar ki paid riewngeit ka Balang Katholik jong ka jylla niam Bah Shillong ha ka sngi U Blei ki la wan na kylleng sawdong ban wan ïa shim bynta ha ka Ïukharist Procession ha Cathedral Parish.
La sdang ïa kane ka sngi da ka mass bakhuid ha kaba u Most Rev Bishop Bernad Laloo Auxiliary Bishop ka jylla niam bah Shillong u la long u nongkñia ba rangbah ha ka jingdon lang jong u Archbishop ka jylla niam bah Shillong u Most Rev Archbishop Victor Lyngdoh, ki Lyngdoh Sohblei na kylleng ki Parish kiba hap hapoh ka jylla niam bah Shillong.
Ha ka nohphai sngi, ka Procession Ïukharist bakhuid ka la sdang ha kaba la ïalam khmat da ka diengphna, bad ka kynhun tem jong ka Cathedral, nangta sa bud da ki Parish bapher bapher, ki kynhun bapher bapher kum ki paid riewngeit kiba kren Hindi, ki Mizo, ki Bodo, ki Naga, ki Karbi, bad kiwei kiwei.
Ha kane ka sngi ka kali kaba kit ïa ka Ïukharist bakhuid ka ïaid sawdong ka Cathedral bad pynkut ha Calvary ha kaba ki khynnah ba riam lieh ki la ïaid hakhmat jong ka kali kaba kit ïa ka Ïukharist bad ba la shong da u Most Rev Bishop Bernad Laloo bad u Most Rev Archbishop Victor Lyngdoh.
Haba kren ha kane ka janmiet u Most Rev Archbishop Victor Lyngdoh u la ong, “U snem 2025 u dei u snem jong ka jingpynïasuk, watla une u snem u la jan kut hynrei ka pynkynmaw ïa ngi ba ngin ïai bteng ban pynïasuk ïa lade, U Blei u la khot ïa ngi ban long kiba pynïasuk bad u. Ïasuk bad U Blei phin ïoh ïa ka jingtngen, ka jingpynim bad ka jingsiewspah.”
U la bynrap da kaba ong ba la buh ïa une u snem kum u snem ban don ka jingpynïasuk iwei ïa iwei, ha ka jingim Khristan ka jong ngi. U Jisu u la ong shai haba phi tyrwa jingkñia bad phi kynmaw ba phi shun ïa ki lok ne ïano ïano leit ban pynïasuk bad sa wan ban tyrwa phin ïoh shibun ki jingkyrkhu.
U Most Rev Archbishop Victor Lyngdoh u la kyntu ïa ki paid Khristan ban long kiba pynïasuk bad kiwei la ki dei kiba ha ïing, ki lok ki jor, ki Lyngdoh ki riewniam long barabor kiba pynïasuk ïa lade bad kiwei.
“Ka jingieid jong U Blei ka kham khraw ban ïa ka jingtlot jong ngi baroh, namar kata ïasuk noh ïa lade ha lade ba rahbor,” u la ong.
U Archbishop Victor u la ong ruh ba u snem 2026 un dei u snem uba ka Balang ka buh kyrpang na ka bynta ki paid riewngeit, ha kaba baroh shi snem ka Balang kan kynmaw kyrpang ïa ki paid riewngeit.
U la ong, “Phi dei ka bynta jong ka Balang, ki Lyngdoh, ki riewniam bad phi ki paid riewngeit ki ïaid lang ha ka jinglong jong ka Balang. Ngin pynkhlaiñ ïa ka jingngeit jong ngi.”
La pynkut ïa kane ka sngi ba khraw da ka jingkyrkhu ha kaba u Most Rev Archbishop Victor Lyngdoh u la ai ka jingkyrkhu ia ki paid riewngeit baroh.
