Shillong, Naiwieng 09
Ka jingtei ïa ka Meghalaya Legislative Assembly kaba thymmai kala ïaid shakhmat bad la khmih lynti ba yn pyndep ha u Jylliew 2026, kaba la pyntip da u Lamphang ka ïingdorbar thawaiñ ka jylla u Thomas A Sangma ha ka jingïalang kaba la long dang ha kane ka taïew ba la lah.
Ka thong kaba la buh nyngkong ka dei ban pyndep ha u Lber 2025, hynrei ki nongshna kila pan por ban pynjlan sa 6 bnai ban pyndep ïa ki jingshna ha ki bynta ba shapoh jong ka ïingdorbar kynthup ïa ka main hall, jaka pdiang briew bad ki jaka shongkai.
Ban pynthikna ba kane ka kam yn pyndep ha ka por kaba la buh, yn lum ïa ka jingïalang man la ka bnai bad ïa ka jingïalang ka ban wan yn sa pynlong ha ka 8 tarik u Nohprah 2025.
U Thomas A Sangma u la pynpaw ïa ka jingkhmih lynti ba ïa ka Dorbar Synrai jong u snem 2026 yn sa pynlong noh ha ka ïingdorbar kaba thymmai ka ban don ïa ki kor ki bor kiba thymmai bad paka, ka jingpyndait ïa ki kor ha kaba ïadei bad ka jingshngaiñ bad kiwei kiwei.
Ka jingshna pynwandur thymmai biang jong ka Dome ka dei kaba la leh ban pynduna ïa ka jingkhia jong ka tnum bad ka dei kaba la khmih bniah da ka IIT Guwahati bad IIT Roorkee.
Kane ka projek ka kynthup ïa ki bynta kiba kongsan bad ïa ka DPR la dep ban pynkhreh na ka bynta ka wat ka baar, kaba kynthup ïa ka jingtei ïa jaka sah jong ki nongtrei ne Staff Quarter bad kiwei kiwei ki jingdonkam.
La phah ruh ïa ki jingtip sha ki tnat jong ka Sorkar Pdeng na ka bynta ban ïoh ïa ka jingmynjur.
