Shillong, Naiwieng 09
U Myntri Rangbah ka Jylla Conrad K Snagma, ha ka sngi Saitjaiñ u la plie ïa ka ophis building ba thymmai jong ka Meghalaya Public Service Commission (MPSC) ha Dakopge, Tura, West Garo Hills.
Haba ai jingkren, u Myntri Rangbah u la ong ba kane ka ophis ka MPSC kan ai jingmyntoi bha ïa ki samla ka ri-lum Garo, kiba ju hap ban leit haduh 10-15 kynta sha Shillong, ban ïakhun ïa ki eksamin.
“Bun kiba poi hapdeng ka jingthait bad hap leit beit beit ban thoh eksam khlem ka jingpynjah thait. Da kane ka ophis, ki samla pule ki lah ban ïakhun ïa ka eksam bad interview hangne hi ha Tura,” u la ong.
U la ong ba ka jinghap ïaid ïa ka lynti kaba jngai bad khlem ka jingpynjah thait ka ktah ïa ka jinglah leh bha jong ki kyrtong kiba ïakhun ïa ka eksam bad kane kala buh ha ka jingeh kaba khraw ïa ki nongïakhun kam na Tura bad kiwei pat ki jaka jong ka Jylla. Kane ka dei kawei na ki ophis ba donkam bha ïa ka ban plie paidbah bad ka jingpynmyntoi jong kane ka ophis ïa ki samla bad ka lawei ka ri-lum Garo kan long kaba bun bha bad nga da sngewhun shisha ban plie ïa kane ka ophis mynta ka sngi,” la ong u Conrad.
U Myntri Rangbah u la pynbna ba ka eksam ba nyngkong jong ka MPSC ha Tura kan long ha ka 14 tarik Naiwieng 2025, ka ban long ka lynnong ba thymmai ha ka ban pynïoh ïa ka lad kaba kham suk ïa baroh ha ka jingïakhun ban rung kam Sorkar. U la pynbna ruh ba ka Sorkar ka don jingthmu ban plie ïa kane ka ophis ha Ri-lum Jaiñtia khnang ban pynïoh lem ïa kajuh ka lad ïa baroh.
Kiwei pat kiba la ai jingkren ki kynthup ïa u Lamphang ka ïingdorbar thawaiñ ka Jylla u Thomas A Sangma bad kiba la ïadon lang ki kynthup ïa u Deputy Commissioner ka West Garo Hills u Vibhor Agarwal, Abraham T Momin, Chairman, Tura bad ki ophisar ka Meghalaya Public Service Commission lem bad kiwei kiwei.
