Tura, Naiwieng, 09
U Myntri Rangbah ka Jylla u Conrad K. Sangma u la leit ban jurip ïa ki jingtrei ba dang ïaid shakhmat ha ka P.A. Sangma Sport Complex ha Tura. U MR u la bishar bniah ïa ka jingïaid shaphrang jong ki bynta bapher-bapher jong kane ka projek, kynthup ïa ka madan ‘indoor stadium’ bad ka pung jngi ‘indoor swimming pool’.
Ha kane ka jingleit jngoh la synran lang ïa u MR da u Deputy Commissioner ka West Garo Hills u Vibhor Aggarwal IAS, bad kiwei-kiwei ki heh sorkar.
Haba kren ha kane ka jingjurip, u Myntri Rangbah ka Jylla u la ong, “Ngi don hangne ha madan P.A. Sangma Integrated Sports Complex ha Tura. Ka madan ïalehkai phutbol ka la dep ban shna bad ka la treikam bha. Ha kane ka bynta yn don ruh ka pung jngi ‘swimming pool’ bad kumjuh ruh ki madan ïalehkai badminton, basketball bad volleyball hapoh ïing (indoor). Kane kan long ka jingkyrkhu kaba khraw na ka bynta katei ka thaiñ bad kaba kham kongsan ka long ruh kum ka jingpynkhreh na ka bynta ka National Games ha u snem 2027.
“U la pyntip shuh-shuh ba ka jingtrei ban tei ka dang ïaid shakhmat bad ba ïa kane ka madan ïalehkai ‘indoor stadium’ la khmih lynti ba yn pyndep ha u snem 2026.”
Ka P.A. Sangma Integrated Sports Complex la thmu kum ka jaka ïalehkai kaba pawnam ha ka pyrthei kaba don ïa ki jingdonkam kiba bun, kynthup ïa ka madan ïalehkai phutbol, ka madan ialehkai indoor stadium bad ka pung jngi indoor swimming pool. Shisien ba la dep, kan long kum ka jaka ba kongsan tam na ka bynta ka jinghikai, ka jingïakop, bad ka jingpynroi ïa ki jingïalehkai ha ka thain Garo Hills.
