Shillong, Naiwieng 09
Ka United Democratic Party (UDP) kaba dei kawei na ki seng riewlum na Meghalaya kaba ïatreilang bad ka NPP ha ka Sorkar MDA-2 ka khlem shah khot ha ki nongïalam kiba thmu ban thaw ïa ka seng saiñpyrthei kaba thymmai ha North East.
Kane ka seng saiñpyrthei kaba thymmai kaba la pynkhreh mynta ka dei kaba la paw pyrthei ha ka jingïakynduh bad ki lad pathai khubor ha nongbah Delhi ha ka jingïalam u Conrad K Sangma, u President ka NPP uba dei u Myntri Rangbah ka jylla ha ka jingïadonlang u nongseng ïa ka Tipra Motha u Pradyot Bikram Manikya Debbarma bad u Daniel Langthasa na Assam.
Kine ki nongïalam ki la pynpaw ba ki kwah ban thaw ïa ka seng saiñpyrthei kaba thymmai “One North East” kaba mut ba ki kwah ban wanrah ïa kawei ka sur jong ki briew kiba sah ha ka thaiñ shatei lam-mihngi ha nongbah Delhi.
Haba ïoh ban ïakren bad u General Secretary ka UDP Bah Titos Chyne u la ïathuh ba ka UDP ka khlem shah khot ha kane ka jingïakynduh jong ki nongïalam na North East ha Delhi ban thaw ïa ka seng saiñpyrthei kaba thymmai.
Haba kylli lada kine ki nongïalam kin khot hadien pat ka seng kan leh kumno, u Bah Titos u la ong ka UDP kan sa shong pyrkhat.
Haba kylli biang ka jingïatreilang ka UDP bad HSPDP ha ka Regional Democratic Alliance ka dang treikam ne em, u Bah Titos u la pyntip ba haduh mynta kane ka RDA ka dang treikam hynrei ïa ka ilekshon MLA ha u 2028 kim pat ïakren eiei.
