Shillong, Naiwieng 09
U Lat jong ka Jylla, kata u C.H.Vijayashankar, ha ka 9 tarik u Naiwieng 2025, u la ïa shim bynta ha ka jingrakhe pynïeng ïa ki Mawbynna ha u Lum Sohpetbneng, kum shibynta jong ka jingrakhe ïa ka jingdap 125 snem kynthih ka Seng Khasi.
Ïa kane ka prokram la pynlong da ka Seng Khasi Sein Raij, ha kaba ïa kane ka jingïalang la wan ïa shim bynta da u Symbud Myntri Rangbah ka Jylla u Bah Prestone Tynsong, u Myntri Rangbah ka Jylla u Conrad K Sangma, u Myntri ba khmih ïa ka tnad pule puthi ka Sorkar Jylla, u Lakhmen Rymbui, u Bah Sanbor Shullai, Myntri ka tnad Art & Culture, bad ki unit bapher bapher na kylleng ka Ri Khasi – Jaiñtia.
U Lum Sohpetbneng, uba la tip kum u “Umbilical Heavenly Peak”, u bat ïa ka jingmut kaba jylliew ha ka liang ka mynsiem bad ka kolshor na ka bynta ka jaidbynriew Khasi-Pnar, kaba pyni ïa ka jingïadei kaba kyntang hapdeng ka bneng bad ka pyrthei ha ka jingngeit u Khasi hyndai.
Kum shibynta jong ka jingdap 125 snem jong ka Seng Khasi, palat 41 tylli ki mawbynna la pynïeng ha kliar jong u ne u lum ba kyntang da ki circle bad ki unit bapher-bapher ban pynkynmaw ïa ka pateng jong ka Seng Khasi, ïa kaba la seng ha ka 23 tarik Naiwieng 1899 ha Shillong hapoh ka jingpynïaid jong u Babu Jeebon Roy.
La 125 snem, ka Seng Khasi ka la pynneh pynsah ïa ka jingngeit niam Khasi, ki jinglong tynrai, ka ktien ka thylliej, ki riti dustur, bad ka jinglong tynrai jong ka jaidbynriew hynñiewtrep.
Haba ai jingkren ha kane ka jingïalang, u Lat ka Jylla u la ïaroh ïa ka Seng Khasi, kum kawei na ki jingpyrshang ban pynneh pynsah ïa ka kolshor tynrai kaba la rim tam bad kaba la burom bha ha ka ri India, bad u la ïaroh ïa ka imlang ka sahlang kaba la ïada ïa ka jingstad jong ki kpa tymmen wat hapdeng ki jingeh jong ka jingkylla jong ka por.
U la pynpaw ruh ba ki Mawbynna kim dei tang ki maw, hynrei ki dak ba kyntang kiba pyni ïa ka jingbteng, ka jingkhlaiñ bad ka jingkynmaw ba im jong ki kpa tymmen.
U la ban jur ruh ïa ka jingdonkam ban pynïadei ïa ka jingkiew jong ka juk mynta bad ka jinglong kyrpang jong ka kolshor bad ka jingsngewthuh ba kynja mynsiem.
U Lat u la pynksan shuh-shuh ba ka jingsumar ïa ka mariang ka la long naduh mynbarim ka bynta ba kongsan jong ka riti dustur jong ki jaitbynriew riewlum ha Meghalaya, khamtam eh hapdeng ki jaitbynriew Khasi kiba la im tynrai ha ka jingïatylli bad ki khlaw ki btap, ka khyndew ka shyiap bad ki marpoh khyndew, da kaba leh burom ïa ki kum ki jingai sngewbha jong u Nongbuh Nongthaw.
U la khot ïa ka jingkitkhlieh lang ban bteng ban ïada ïa ki jingthaw ba riewspah jong ka Meghalaya, ki khlaw ki btap bad ki mrad ki mreng na ka bynta ki pateng ban wan.
U la ai khublei ïa ka Seng Khasi halor kane ka mawjam ba kongsan bad pynpaw ka jingshaniah ba ka jingrakhe 125 snem kan nang pynskhem shuh shuh ïa ka jingsarong ha ka kolshor, ka jingïatylli bad ka jingpynneh pynsah ïa ki pateng barim, kaba ïahap bad ka jingthmu jong ka ri jong ka Viksit Bharat kaba la pynshong nongrim ha ki tynrai jong ka kolshor bad ka jinglong tynrai.
