Tura, Naiwieng 09
Ka A’chik Holistic Awakening Movement (AHAM) ka la ban biang halor ka jingdawa jong ka ban pynlong ïa ka Tura kum ka ‘Winter Capital’ jong ka Jylla da kaba pynphai ktien ïa ka jingkren u Lamphang ka Jylla, u Thomas Sangma halor ka jingpynlong ïa ki jingshong Dorbar ki bym long pura ha ki bynta bapher-bapher jong ka Jylla.
U Lamphang u la pynskhem ruh ba wat hapdeng kane ka sienjam, ka Shillong kan ïai bteng ban long ka jaka pdeng jong ka Ïingdorbar Thawaiñ.
Na ka liang ka seng, ka la ñiew ïa katei ka sienjam kum ka jingleh ka bym ïahap bad ki jingangnud jong ki paidbah ka Ri-lum Garo.
“Ki jingkren jong u Lamphang ki pyntlot noh ïa ka jingthmu haba ïadei bad ka jingseng ïa ka Meghalaya. La seng ïa ka Jylla halor ki nongrim jong ka jingïatylli, ka jingïadon bynta lang, bad ka jingroi kaba long pdeng hapdeng ki thaiñ Khasi, Jaiñtia, bad Garo. Ban pynpaw ba ka Shillong ka dei ban sah junom kum ka jaka pdeng jong ka bor synshar, ka wanrah ïa ka jingleh donbor ha ka synshar-khadar bad ka jingbym ïabiang ha ka thaiñ, kaba la long ka daw tynrai jong ka jingshah ieh beiñ ka Ri-lum Garo la palat sanphew snem,” ong u President, u Georgeprince Momin haba ñiew ïa kane ka jingkren kum ka jingpynduh mynsiem.
Ka AHAM ka sngew ba ka sor Tura ka dei hok ban ïoh ym tang ïa ki jingïalang ki ban long kum ka dak ne nuksa, hynrei ban pynlong ruh ïa ka kum ka ‘Winter Capital’ jong ka Jylla.
“Ka jingthmu ban tei ïa ka Additional Secretariat Building ha Tura ka dang sah khlem shna haduh mynta (la buh ïa u maw nongrim jong ka mynta ka step, ka 8 tarik u Naiwieng). Ngim kwah ïa i bynta barit jong ki jingïalang ka Ïingdorbar ne ki jingkular ba thylli. Ngi dawa ïa ka jingithuh jong ka Riti Synshar da kaba pynlong ïa ka Tura kum ka ‘Winter Capital’ ka Meghalaya – ha ryngkat ki bor pynïaid kam ba pura, ki ophis, bad ki jingshong Dorbar ha ka por tlang,” u la bynrap.
Haba ïadei bad ki Jylla kiba la pyntreikam hok ïa ka rukom synshar jong ar tylli ki nongbah, ka AHAM ka sngew ba ïa kane kajuh, ka long kaba dei hok na ka bynta ka Meghalaya kumjuh ban pyntikna ïa ka jingsynshar kaba ïabiang tara bad ka jinglah ban ïoh bynta lang.
“Ngi nang kham sngewsih namar ka jingshah leh mei-nah kaba ïai bteng na ki Sorkar – kawei-hadien-kawei. Kiba bun ki projek kiba heh ha ka thaiñ – naduh ki surok haduh ki ‘hospital’, ki skul haduh ki ophis Sorkar – ki sahkut ne kim pat biang pura. Ka jingngeit jong ki paidbah ka shah tynjuh,” la pynskhem u Momin.
Haba kynthoh ïa u Lamphang halor ka jingkren jong u ba ka Shillong kan ïai bteng ban long ka jaka pdeng jong ka bor synshar, ka AHAM ka la kyrpad ïa utei u nongïalam ban trei haba ïadei bad ki jingangnud jong ki paidbah ka Ri-lum Garo.
Shuh shuh ka AHAM ka dawa ba dei ban pynbna paidbah ïa ka Tura kum ka ‘Winter Capital’ bad ban sdang mardor ïa ka kam halor ka Additional Secretariat bad kyrpad ban pynlong ïa ki jingshong Dorbar ba pura ha Tura.
