Mawkyrwat, Naiwieng 09
Ka Meghalaya Weightlifting Association ha ryngkat ka jingïatreilang bad South West Khasi District Weightlifting Association lem bad ka ophis jong u District Sports Office, South West Khasi Hills District ha ka ka 8 tarik u Naiwieng, 2025 ka la ïoh ban pynlong ïa ka 4th State Weightlifting Champions 2025 ha Indoor Stadium, Mawkyrwat, South West Khasi Hill’s District, Mawkyrwat ha kaba u Vijay Sharma (Dronacharya Awardee), India Weightlifting Coach, Coach of Olympic Medalist Mirabai Chanu u long kum u kongsan.
Lah ban kdew ba kane ka lympung ïakop rah-nar ne ka Weightlifting ka long ruh shibynta jong ka jingpynkhreh ïa ka 39th National Games Meghalaya 2027 ha kaba ki nongïashimbynta ki long naduh kiba la kham heh karta haduh kiba dang rit karta bad kiba la pyni shisha ïa ka sap ka phong ba ki ki don kumno ban rah ïa ka nar katkum ka jingkhia ba la buh.
Ki nongwan ïa shimbynta ha ka jingïakop rah-nar jong ki kynthei baroh ki long 21 ngut, kata ha ka kyrdan ba 44 Kilo ki don 8 ngut, ha ka kyrdan ba 48 Kilo ki don 3 ngut, ha ka kyrdan ba 53 Kilo ki don 2 ngut, ha ka kyrdan ba 58 Kilo ki don 5 ngut, ha ka kyrdan ba 63 Kilo ki don 2 ngut bad ha ka kyrdan ba 69 Kilo ki don tang iwei.
Nangta, ha ka liang ki shynrang ki don baroh 25 ngut kata kiba dei ha ka kyrdan ba 56 Kilo ki don baroh 7 ngut, ha ka kyrdan ba 60 Kilo ki don baroh 9 ngut kynthup ki khynnah, ki rangbah bad ki samla, ha ka kyrdan ba 65 Kilo ki don baroh 5 ngut, ha ka kyrdan ba 79 Kilo ki don tang uwei kine baroh ki dei jong ki shynrang.
Hadien ka jingïakop la ïoh ban sam ïa ki khusnam sha baroh ki nongjop kiba wan ha ka kyrdan ba nyngkong, ba ar bad ba lai. Nangta, la sam ruh ïa ki khusnam kyrpang sha ki ar ngut ki nongïashimbynta kiba dang kham rit karta ïa u Dawan Marweiñ, 9 snem karta bad ka Baiakmenlang Suting, 9 snem kiba dei na Ribhoi District.
Ha kane ka sngi la ïadonlan u A.S.P. Marak, MCS, Assistant Commissioner ka South West Khasi Hills District kum u symbud kongsan, u bah Donald Rymbai, President ka Meghalaya Weightlifting Association, ki nongkitkam jong ka South West Khasi District Weightlifting Association lem bad kiwei de.
