Shillong, Naiwieng 09
Ki North-Eastern Hill University Student’s Union (NEHUSU) bad ka Khasi Student Union (KSU), NEHU Unit, ka la aiti da ka shithi sha u Myntri ba khmih ïa ka pule-puthi jong ka Sorkar Pdeng, u Dharmendra Pradhan, ban pynpaw ïa ka jingpyrshah kaba jur ïa ka jingkhot jingïalang kaba 193 jong ka Executive Committee (EC) jong ka NEHU, kaba la buh ban pynlong ha ka 14 tarik u Naiwieng 2025, ha Delhi, hapoh ka jingpynïaid jong u Vice-Chancellor, u P.S.Shukla.
Ha ka kyrwoh ba la phah, ka NEHUSU ka la ong ba ha kaba sdang ki kwah ban pynshai ba ka jingpyrshah jong ki, kam dei ban pyrshah ïa ka jingkhot ïa ka Executive Committee, hynrei ka jingpyrshah ka mih tang na ka rai ba pynïaid ïa ka jingïalang hapoh ka jingpynïaid jong u P.S.Shukla bad shabar jong ka jaka pule jong ka NEHU, baroh bad ki samla ka NEHU bad ka KSU ki pyrshah ïa ka jinglong hok jong ka tnad treikam bad ki jingpyn thikna ba la ai mynshuwa sha ka imlang ka sahlang jong ka Skulbah.
Lah ban pynkynmaw ba ka tnad pule-puthi (MoE), ha ka jingleit jurip jong ka NEHU ha ka 22 tarik u Jymmang 2025, la pynthikna ïa ki samla pule ba mihkhmat, ha ka jingdonlang ka NEHU Teachers Association (NEHUTA) bad ki dkhot jong ka Executive Committee, ha ka jingïalang jong ka Executive Council kaba la long ha ka 30 u Jymmang 2025, kaba dei ruh ka jingïalang ba khatduh ba la pynïaid da u Shukla bad hadien kata un sangeh noh ban pyntreikam ïa kino-kino ki kam synshar ha kane ka Skulbah.
“Ka jingpynbna kaba mynta kaba khot ïa ka jingïalang jong ka EC ha ka 14 tarik Naiwieng 2025, ha Delhi namar kata, ka long ka jingpynkheiñ ïa kane ka jingpyn thikna bad ka jingpynkheiñ ruh ïa ka jingshaniah ba la pynshong nongrim ha ka Skulbah,” ka la ong.
Shuh shuh, ka jingbthah jong ka Tnad hi (Shithi No. F. No. 20-13/2024-CU.IV, ka 20 tarik u August 2024), ka kren shai ba ki jingïalang ba kynthup ïa ka EC bad ka komiti pla tyngka, “Yn pynlong hapoh ka jaka pule jong ka Central University” ka jingpynïaid ïa ka jingïalang jong ka EC, ba 193 ka ban sa long ha Delhi, ka long namar kata, ka ban pyrshah beit ïa kane ka jingbthah.
Ha ka shithi ba la phah sha u Myntri, ka NEHUSU ka la ong, ba ka NEHU ka don ïa ka jaka treikam kaba pura ha Shillong, ryngkat bad ki jingdonkam baroh ban pynlong ïa ki jingïalang. U Vice-Chancellor, uba dei peit mynta ïa ka academic bad ki kam synshar, u long uba lah ban pynïaid ïa kum kine ki jingbishar, katkum ki aiñ jong ka Skulbah. Kumta ban pynlong ïa ka jingïalang ha Delhi ka long ka bym donkam, ka bym ryntieh, bad kaba long pyrshah.
“Ngi pynkynmaw shuh-shuh shaphang ki jingeh kiba jur ha ka liang ka pisa tyngka kiba ka NEHU ka ïa kynduh mynta,” ka la ong shuh-shuh.
Ia ka jingmang pisa bym dei tulop, la pynduna na ka ?53 klur sha ka ?31 klur na ka bynta u snem mang tyngka 2025-26 kaba long 25% ka jingpynhiar ïa ka mang tyngka ha ki tnad pule-puthi, ka jingpynhiar 50% ïa ki jingïalang bad ki prokram pule, ka jingpynduna ïa ka jingsumar ïa ki hostel, ki tiar jong ka library, bad ki jingshakri ïa ki samla pule bad ka jingpynsangeh ïa ki jingthung kam nonghikai bad ki jingsiew wat hapdeng kine ki jingpynlut pisa, ka bor synshar ka tyrwa ban pynlut ha ka leit ka wan, ka jaka sah, bad ka jingpynbiang na ka bynta ka jingïalang jong ka EC ha Delhi bad kane ka long kaba ym lah ban pynshisha ha ka liang ka pisa tyngka bad kaba ym ïahap bad ki jingpynbna jong ka Skulbah.
