SSA Super Cup 2025: Pynliem noh ka Lajong ha ka Semifinal ba 2 ïa ka Mawlai

Shillong, Naiwieng 09

Ka Shillong Lajong kan ïakhun pyrshah ïa ka Rangdajied United ha ka phainal ba nyngkong eh jong ka SSA Super Cup 2025 hadien ba ka la jop ïa ka Mawlai da 1-0 kol ha ka jingïakhun semifinal kaba ar ha madan SSA ha madan First Ground, Polo, ha ka 08 tarik Naiwieng 2025.

Ka kol kaba la thep ha kane ka jingïalehkai ka dei tang kawei, lyngba u Arkibor Makhroh ha ka minit kaba 27.

Ka Rangdajied ka la jop ïa ka jingïalehkai semifinal ba nyngkong pyrshah ïa ka Langsning kaba la jop ha ka Shillong Premier League ha ka sngi Thohdieng da 2-0 kol.

Kane ka lympung ba thymmai ka SSA Super Cup, kaba la pynlong da ka Shillong Sports Association, ka pyndap sa kawei pat ka kyrdan jong ka jingïakhun bad ka jingkmen ïa ki nongkyrshan ïa kane ka jingïalehkai, ha kaba ki Top 6 na ka SPL 2025 ki ïakhun ïa ka ha ka jingïakhun knockout. Ka Langsning, kum ka nongjop jong ka SPL, bad ka Shillong Lajong kaba wan ba-ar ka la ïoh jaka beit beit ha ka semifinal, katba ka Rangdajied bad ka Mawlai ki la hap ban wan lyngba ka playoff ban rung sha ka last-four.

Baroh arliang ka Lajong bad ka Mawlai ki la pynkut noh ïa ka jingïalehkai da kaba don mar shiphew ngut ki rangïalehkai ha madan. Ka Mawlai ka la shah pynshong noh u ‘ranglehkai jong ka u Kevin Rymbai ha ka minit kaba 70 hadien ba u la don ka jingïakren bad u referee (u la don lypa ha ka yellow card shwa kata) bad ïa u Banlamkupar Rynjah ka SLFC la pyni ïa ka yellow card kaba ar namar ba u la pynlut kai ïa ka por katba dang shah bujli (substituted).

Ka kol ka la wan lyngba ka korner. U rangïalehkai ka Lajong, u Wilbert Marbaniang, u lah ban ïoh ban pyndei da ka khlieh sha ka bol hynrei kan jin da la ïaid shabar lada kam shym la kynjat da u Arkibor, uba don shadien jong u Wilbert.

Ka Lajong ka la lah ban pynkut noh ïa ka jingïalehkai da ka penalty kaba kham hadien, ïa kaba u nongapkol ka Mawlai u Lambhamiki Lamare u la shah pynphai hadien ba u la pyn-ur ïa u rangïalehkai pyrshah ha phylaw kol. Hynrei u Custodian u la pyndap ïa kata ka jingbakla da kaba khanglad ïa ka spot kick jong u Mebanaibok Kharbudnah.

Ka Mawlai ka la ïalehkai stet bha hynrei kumba la ju jia ha palat ïa kawei ka sien ha kane ka samoi, ka jinglong thikna jong ka jingïalehkai bad ki jingïalehkai ba khatduh jong ki kam shym la poi sha ka thong. Na ka liang ka Lajong ka la long kaba tbit khlem da donkam ban thombor ha ka jingïalehkai.

Ka SLFC ka la leh ïa kaei kaba ka la dei ban leh ban pynneh ïa ka jinglam khmat, ha kaba u ‘rangap kol u Wanteilang Malngiang u la ïoh ban bat sa kawei pat ka jingïalehkai khlem da shah pynphai kol – u la shah thep kol tang ha kawei ka jingïalehkai ha kylleng ka SPL bad ka Super Cup mynta u snem katba u dang pynneh ïa ki hynriew tylli ki jinglehkai khlem shah thep kol. La pynkup burom ïa u kum u T7 Player of the Match bad la ai ïa u da ka cheque kaba T.5,000 bad ka memento da u Vice-President ka SSA u Cliff Nongrum.

Ka jingïakhun phainal kan long ha ka 13 tarik Naiwieng ha ka por 5 baje janmiet.