Shillong, Naiwieng 09
U ‘rangialehkai phutbol ba pawkhmat ka Argentina, u Lionel Messi, u la ong ba u kyrmen ban ïoh ïalehkai ha ka FIFA world Cup 2026, watla u la kam ba kan shong eh ha ka jingkoit jingkhiah jong u halor kane ka bynta.
Ha ka jingïakren bad ki lad pathai khubor, une u rangïalehkai ba la 38 snem ka rta u la pashat jingmut halor kane ka lympung ïalehkai phutbol kaba long la shem snem ha United States, Mexico bad Canada.
“Ngan ïai khmih ia kane man ka sngi haba ngan sdang ia ka jingkilan na ka bynta ka aiom ialehkai kaba thymmai la shem snem bad ka Inter (Miami) bad peit la ngan long 100% ne em, la ngan long uban lah ban ai jingmyntoi ne em ia la ka ri, bad ngangta ngan sa rai,” la ong une u rangïalehkai ba la jop haduh phra sien ia ka Ballon d’Or.
“Nga thrang shihsha namar ka dei ka World Cup. Ngi la jop ia ka World Cup ba la dep bad ban ïoh ïa ka lad ban pynneh ïa la ka nam lahduh ha ka pyrthei kan da long kabasnghewtynnat shisha namar ba ka long ka burom kaba khraw ban ïoh mihkhmat ïa la ka ri, khamtam ha ki lympung kiba paw, te kumta nga da kyrmen ba U Blei Un ailad biang ia nga sa shsien.”
Hadien ka jingioh rung sha ka World Cup ha ka jingïakhun ha u Nailur, u Messi u la ïathuh sha ki lad pathai khubor ba un dang ap shuwa ba un ai ia kano kano ka rai halor kane.
“Kumjuh kumba nga la ong mynshuwa shaphang ka World Cup ngam tharai ba ngan dang lah ban ïalehkai sa ha kawei pat, Namar ka kyrta jong nga, kaei kaba nga lah ban sngewthuh ka long ba nga lah ban myn ïashim bynta shuh,” la ong u Messi hadien ba ka Argentina ka la pynliem ïa ka Venezuela da 3-0 kol ha ka 5 tarik Nailur mynta u snem.
“Haba phai pat mynta, ngi la jan poi sha ta, nga sngew kmen bad ioh mynsiem bha ban ïashim bynta biang. Hynrei kumba nga la ong nga peit khmih shuwa ialade man ka sngi kumno ka met jongnga ka long. Nga la sdang sngewtynnat bha mynta, hynrei don pat ki sngi ngam da kham sngewtynnat than ka met. Namarkata ngan sa pet kaei kaban jia.”
