Shillong, Naiwieng 10
Ka jingtrei shitom bad ka jingïatylli ki rangïalehkai U-23 kala pynlong ïa ka Meghalaya ban pynliem noh ïa ka Sikkim da 93-run ha ka lympung ïalehkai U-23 Men’s State A Trophy 2025-26 (plate group) ha Ropar, Punjab myn ha ka sngi Saitjaiñ ka taïew kaba la lah.
Haba phai sha ka jingïakhun, ïa ka jingïakynting pisa (toss) la jop da ka Sikkim ha kaba ka la ailad shwa ïa ka Meghalaya ba kan tied nyngkong, ha kaba ka la lah ba kan kamai 252 ron na ki 49.4 over.
Haba la dei pat ka pali ban beh ïa kane ka thong, ki nongtied ka Sikkim ki la shah pynhap iwei hadien iwei bad ban kamai tang 159 ron na ki 38.1 over.
Ha ka por ba wan ban tied, la don lai ngut ki nongtied ka Meghalaya kiba la lah ban kamai haduh 40 ron, ha kaba u rangïalehai ba la tied kham bun dei u Dipankar Baruah 47 run na ki 35 tylli ki bol, bud pat sa u Sachin Kumar ba la lah ban kamai 43 ron na ki 60 tylli ki bol bad u Josiah Momin 41 ron na ki 63 bol bad ryngkat bad u Dipankar bad u Sachin kiba la seng ïa ka nongrim ban kamai 86 run na ka bynta ka wiket ba nyngkong.
Nalor katta, u Manish Sharma kum u kapten, u la lah ban lamkhmat ïa la ka kynhun ban kamai 32 ron ba la wan tang na ki 32 tylli ki bol, katba na ka liang ki nongkawang bol ka Sikkim u Siddarth marwei u la ïoh ban khur 5 wiket na ka bynta 32 ron na ki 5.4 over.
Katba na ka liang ki nongkawang bol ka Meghalaya, u Manish u la ïoh ban khur 3 wiket na ka bynta 28 ron na ki 10 over, ban khanglad ïa ka Sikkim na ka bynta ban jam suk shakhmat, bad bynrap lang da ki 2 wiket na ka bynta 16 ron na ki 5 over u Denikcheng Marak, nangta sa 2 wiket na ka bynta 25 ron u Shavian Blah bad Sachin ruh u la ïoh ba un khur lem 2 wiket na ka bynta 28 ron, kaba la seng nongrim ba khlaiñ bha ïa ka Meghalaya ban jop ha kane ka jingïakhun.
Hadien kane ka jingïakhun, ka Meghalaya kan khreh pat ba kan ïakhun pyrshah ïa ka Manipur kaba la buh ban long ha Mohali naduh ka sngi Ba-ar, ha kaba ka Manipur ka rung sha kane ka jingïakhun hadien ba ka la jop ïa ka Arunachal Pradesh da 7 wiket.
