Shillong, Naiwieng 10
Ki samla pule ka North Eastern Hills University, Student Union bad ka Khasi Student Union NEHU Unit ki la pynlong ïa ka jingïakhih ha khmat ka ICSSR, NERC NEHU ban pan jingpynshai na u Pro-VC ka Skulbah, ha kaba ïadei ka jingkhot pynlong ïa ka jingïalang ba 193, ha Nongbah Delhi ha ka 14 tarik Naiwieng 2025, ïa ka ban sa khlieh da u Prof. Prabha Shankar Shukla uba dei u Vice Chancellor ka Skulbah NEHU.
Ki samla pule kiba la wan ban ïalum khrui ha katei ka jaka, ki la pynpaw ba kim kwah ba katei ka jingïalang ba 193 jong ka Skulbah NEHU kan long ha Nongbah Delhi ha ka jingpynïaid u Prof. Shukla da kaba kdew ba kam long kaba shong nongrim ban pynlong ïa ka jingïalang shabar jong ka Skulbah bad ki la dawa ban pyndam noh ïa ka jingpyntip bad ban pynsangeh shuwa ïa katei jingïalang.
Da ki spah ngut ki samla pule jong ka Skulbah ki la leit ban tur sha ka ophis ka ICSSR, NERC NEHU ha ryngkat ka jingpyrta bad ka jingrah ïa ki plakad, ha kaba ka la mih ruh ka jingïania bad ka thma ktien kaba jur hapdeng ki samla pule bad u Pro-VC ka Skulbah u Prof. S. Umdor.
Kham hadien u Pro-VC jong ka Skulbah u la shim ïa ka rai ban phah da ka jingthoh sha ka tnad pule puthi ka Sorkar Pdeng ban phah pynsangeh noh ïa ka jingkhot jingïalang ha Nongbah Delhi.
Haba kren sha ki nongthoh khubor u President ka KSU NEHU Unit u samla Robin Nongrem u la ïathuh ba ïa katei ka jingïalang, u Pro-VC u la phah da ka jingthoh sha ka tnad ban phah pynsangeh noh ïa ka jingïalang bad la pynduh noh ïa ka jingpyntip namar ka jingpyrshah ki samla pule ka Skulbah NEHU.
U samla Robin u la ong ba, katkum ka jingpyntip ba la pyllait da ka tnad pule puthi ha u snem 2024, ka kdew shai ba kino-kino ki ‘Central University’ ki lah ban pynlong ïa ka ‘EC Meeting’ hapoh jong ka University, hynrei kaba sngew lyngngoh ka long ba balei hap ban leit pynlong ‘EC Meeting’ shaduh sha Nongbah Delhi?
Shuh-shuh u la bynrap ba u Pro-VC ka ‘University’ u ju ud ba ka NEHU ka don hapdeng ka jingduna pisa, ha kaba ki ba bun ki kam bad ki prokram ba dei ban pynlong, la hap ban pynsangeh, katba ïa ka ‘EC Meeting’ la khot pynlong shaduh Nongbah Delhi, ha kaba ka Skulbah ka hap ban bei tyngka ïa baileit-baiwan, ki nongleit ban mihkhmat sha katei ka ka jingïalang bad kane ka la ktah ïa ka pla tyngka jong ka Skulbah.
