Shillong, Naiwieng 10
Kum shi bynta ban kyntiew ïa ka jingïalehkai kriket ha ka jaidbynriew Khasi, ka Sports Committee jong ka KSU sa shisien kan pynlong biang ïa ka Maitshaphrang Khasi League T20 Cricket Tournament 2025 ha ka sien kaba lai.
Kane ka lympung kan sdang ha ka 8 tarik u Nohprah bad yn pynkut ha ka 20 tarik jong ujuh hi u bnai.
Kane ka lympung kan plie lad ïa baroh ki samla Khasi kiba thrang ban kiew ha ka jingïalehkai kriket. Shuh shuh ha kane ka lympung yn ailad kyrpang ïa ki khynnah ba dang hapoh 19 snem bad 23 snem ka rta ba don ha baroh ki kynhun ki ban ïashim bynta lang.
Ïa kane ka lympung yn pynlong ha 5 tylli ki madan ïalehkai, kata ha Urkaliar, Lawsohtun, Nongsder, Laitkor bad Polo. Ïa ki jingtip ba kham bniah ki lah ban ïoh na ki bor pynïaid. Kane ka long kat kum ka kyrwoh ba la pyllait da u Eric A, Nongkynrih, Chairman bad u Badonbok Malngiang, Secretary ka Sports Committee KSU.
