Shillong, Naiwieng 10
U MLA ka Khliehriat Constituency u Bah Kyrmen Shylla u la kyntu ïa ki nongshong shnong ka Wapung Shnong bad Wapung Skur ba kin pynbeit da ka jingïasngewthuh jingmut lang halor ka jingïakajia pud jong ki khnang ban pynthikna ban pynurlong ha ka por kaba biang ïa ka projek siang madan phlang plastic ne artificial turf kaba la thmu ban siang ha thaiñ Tuber.
Haba pynpaw ha ka jingïalang pynkut ïa kawei ka lympung ïalehkai phutbol ba la pynlong da ka Umshongpet Sports & Welfare Organisation ha Wapung Skur, u Bah Kyrmen u la pynpaw ba ïa kane ka projek la ai jingmynjur da u Myntri barim ba dei khmih ïa ka tnat ïalehkai u Bah Shakliar Warjri na ka bynta ka East Jaiñtia Hills District, ha kaba ka jaka kaba u la ai jingmut kan long ha Wapung Shnong.
U la ong ba ka jingpynslem ban pyntreikam ïa kane ka projek ka lah ban pynpulon noh ïa katei ka skhim bad ka lah ban wanrah ïa ka jingshah pynthut kaba khraw na ka bynta ka jingkiew jong ka jingïalehkai ha katei ka thaiñ.
U Bah Shylla u la ong ba ka jingthmu ba kongsan jong u ka long ban pynthikna ba ki jingtei na ka bynta ki jingïalehkai kin ai jingmyntoi ïa ki samla ha kylleng jong ka konstitwensi. U la pynthikna ruh ïa ka jingpyrshang ban pynbha ïa ki madan kiba kham rit ha kiwei pat ki thaiñ ban kyntiew ïa ka sap ïalehkai bad ka imlang sahlang.
