Imphal, Naiwieng:
Ki bor pahara ha Manipur ki la pynjulor noh ïa ki kper rep syntiew Poppy kiba heh haduh 35 akar ha kylleng ka shnong Songlung bad ha ki jaka ba marjan jong ka Lhangjol bad Waphong ha Kangpokpi distrik ha ki ar tylli ki jingkhynra ba kyrpang mynta u bnai.
Ka jingkhynra kaba khatduh, kaba la pynlong ha ka 8 tarik u Naiwieng, ka la thmu kumba san akar ki jaka rep beaiñ ha kane ka thaiñ kaba hap hapoh ka jingpeit jong ki pulit ka Kangchup Police Station.
Ki pulit ki la kurup 8 tylli ki kuli ba thylli, lai tylli ki pla song boh, bad ki symbai poppy ba la lap hajan lai tylli ki ïing rit ba la thang ha ka jaka rep.
Kane ka jingkhynra, ka dei hadien ka jingkhynra kaba kham heh ha ka 2 tarik Naiwieng, ha kaba ki bor pahara, ki la pynjot ïa ki kper poppy, kiba heh 30 akar, ha kijuh ki shnong, kum shi bynta jong ka Nasha Mukt Bharat Abhiyan, kaba dei ka jingpyntreikam jong ka sorkar, ha baroh kawei ka ri, ha ka ri pyrshah ïa u drok.
Ha kane ka jingkhynra, ki pulit ki la pynpra ïa lai tylli ki ïing rep bad kurup lai tylli ki pla sboh bad ar tylli ki byrni mluh. Na katei ka jaka la lap ruh ar tylli ki kali Gypsy kiba la shah thang.
Ki heh sorkar ki la ïaroh ïa ki bor pahara na ka bynta ka jingpyrshang ba bteng jong ki ban ïaleh pyrshah ïa ka jingkhaïi beaiñ, kaba buh jingma kaba khraw ïa ka koit ka khiah jong ki paidbah bad ka jingbha jingmiat jong ki samla ha katei ka thaiñ.
