Shillong, Naiwieng 10
Ka Meghalaya ka la khur ïa ka jingjop ryngkat bad ka rekod kaba heh tam ha ka lympung ïalehkai Ranji Trophy, hadien ba ka la lah ban pynliem noh ïa ka Arunachal Pradesh da ka inning kaba long haduh 446 ron, ha ka lah sngi U Blei ha Surat.
Haba wan ban bteng ïa ka pali wan tied kaba ar na ki 29 ron na ka bynta 3 wiket, ka Arunachal sa shisien ka la shah pynhap wiket baroh na ka bynta 109 ron, kaba jia hadien ba ha ka pali wan tied ba nyngkong (first innings) ka la lah shwa ban kamai tang 73 ron hadien ba la lap ba hap baroh ki wiket.
Kumban shu pynkynmaw ba ha ka pali wan tied jong ka Meghalaya, ka la lah ban kamai haduh 628 ron hashwa ba kan rai ban khylliap noh ïa ka pali jong ka hadien ba ka la hap tang 6 wiket.
Na ka liang ki nongkawang bol ka Meghalaya kata u Aryan Bora u la khur 3 wiket na ka bynta 45 ron na ki 16 over, katba u Ajay Duhan (guest professional) u la ïoh 2 wiket na ki 1.4 over, u Aaron Nongrum 2 wiket na ka bynta 8 ron na ki 6 over bad u Akash Chaudhary 2/29 na ki 8 over.
Kumban shu pynkynmaw ba ka nam jop kaba heh shwa ïa kane na ka bynta ka Meghalaya ka long pyrshah ïa ka Mizoram kaba long da ka inning kaba 425 ron ha ka samoi ïalehkai 2019-20 jong kane ka juh hi ka lympung.
Ha lyndet kane ka nam jop ba heh tam biang sa kawei ïa ka kynhun ïalehkai ka Meghalaya ka long ka ‘double century’ lyngba u Arpit Bhatewara uba la lah ban kamai 207 ron, bud pat sa ka 119 ron na u Kishan Lyngdoh, 144 ron na u Rahul Dalal (guest player), bad ha kajuh por ym lah ban klet ïa ka rekod kamai ïa ka 50 ron (half century) kaba sted na kiba sted tam ba la wan lyngba u Akash Chaudhary ha kaba u la lah ban da bynrap bad ka jingtied lynter ïa ki 6 tylli ki ‘six’.
Ha kaba kut kane ka jingïakhun ka nam Player of the Match ka leit sha u Arpit bad kane ka jingjop ka Meghalaya ka la wan hadien ba artylli ki jingïakhun ba shakhmat ki la kut ha ka ïakhaid, katba kawei la hap ban pynsnageh noh.
Ïa mynta, ka Meghalaya kan ïai sah shwa ha Surat kum shi bynta ka jingpynkhreh ïa ka jingïakhun pyrshah ïa ka Manipur ka ban sdang naduh ka 16 tarik mynta u bnai.
