Shillong, Naiwieng 10
Ka lahduh ha Italy ka Napoli, ka la mad ïa ka jingshah rem ha ka Bologna da 2-0 kol ha ka sngi U Blei ha ka lympung ïalehkai jong ka Serie A bad kane ka long ka jingplie lad ïa ka Inter Milan ban kynjoh sha ka kyrdan ba hakhlieh hadien ba ka la pynliem noh ïa ka Lazio da kajuh ka kol.
Ka Roma, kaba la pynliem ïa ka Udinese da 2-0 kol kham hashwa, ka la kamai mar 24 point bad ka Inter, hynrei ka la duna lyngba ka jingïapher ha ka jingthep kol.
Tang mar ïasdang ka jingïalehkai tang ha ki lai minit, u Lautaro Martinez u la ïoh ban pynkhih jar nyngkong eh na ka bynta ka Inter bad hadien la thep sa u Ange-Yoan Bonny ban pynlong ïa ka kynhun ban khur syndon ïa ka jingjop. Ha ka jingshisha ka Inter ka la dei ban thep biang sa shi kol lyngba u Piotr Zielinski, hynrei kane ka jingpyrshang ka la long lehnohei hadien ba la bishar bniah lyngba ka VAR.
Ha kawei pat ka liang ki kol ba la thep da u Lorenzo Pellegrini bad u Zeki Celik ki la pynlong ïa ka Roma ban don ha ka thup kaba hakhlieh bad kamai 24 poiñ na ki 11 sien ïakhun.
Ka jingïoh ban thep kol nyngkong na ka bynta ka Roma ka la wan hadien ka jingbakla u Hassane Kamara hapoh ‘box’ bad ban pynlong ïa u Lorenzo ban thep kol lyngba ka penalty. Hashwa ban kut ka jingïalehkai jong ka kylla step u Pellegrini u la ïoh biang ïa kabu kaba biang, hynrei um shym la lah ban pynurlong na ka jingïashan tyngeh u rangapkol ka Udinese u Maduka Okoye.
Kham hashwa, ka Napoli kam shym la lah ban pynurlong ïa ka jingjop watla ka AC Milan ka la kut ha ka jingïakhaid mar 2-2 kol pyrshah ïa ka Parma ha ka sngi Saitjaiñ ha Stadio Renato Dall’Ara.
Ha kiwei pat ki jingïakhun, ka Sassuolo ka la pynliem noh ïa ka Atalanta da 3-0 kol bad ka Genoa ka la ïakhaid mar 2-2 kol ha Fiorentina.
