Guwahati, Naiwieng:
Ka sorkar Assam ha ka Sngi U Blei ka la sdang biang ïa ka jingpynkynriah shnong jong ka ha Goalpara distrik ban pynkhuid ïa ki jingkynnoh ba la tur bad pyndonkam bakla ïa ki jaka khlaw kiba heh 1,140 bigha (palat 376 akar) hapoh ka Dahikata Reserve Forest, kaba la ktah ïajan 600 tylli ki longïing.
U Deputy Commissioner ka Goalpara, u Prodip Timung, u la ong ba ka jingpynkynriah ïa ki briew ka dang ïaid “da ka jingsuk” bad ba la pynmih ïa ki jingpynbna lypa la palat ar taïew shwa, ha kaba la bthah ïa ki nongshong shnong ban pynkynriah noh ïa katei ka thaiñ.
“Ki don 580 tylli ki longïing kiba la rung tuh ha ka jaka kaba heh 1,140 bigha. Kumba 70% na ki ki la dep ban phet noh hadien ba ki la ïoh ïa ki jingpynbna, bad kiba sah ki dang don ha ka jingïaid lynti ban mih noh,” u la ong ha ka lad phah khubor.
Ka bor synshar ka la phah ïa ka kynhun kaba bun jong ki bor pahara bad ki mashin kiba heh, kynthup ïa ki mashin tih maw bad ki traktor, ban pyndep ïa ki jingpynpra. Ïa katei ka jaka la phiah ha ki san tylli ki block, bad la ïathuh ba la don ka jingpyrshah tang ha kawei, la bynrap biang u Timung. “Ngi khmih lynti ban pyndep ïa ka jingpyntreikam ha kaba kut jong ka sngi”, u la ong.
Ïa kane ka jingbeh shnong, u la pynshai, la pynlong katkum ki jingbthah jong ka Gauhati High Court, kaba la bishar kham mynshwa ïa ki jingujor kiba bun jait, kiba ïadei bad kane ka jingpyntreikam.
Ki heh sorkar ki la ong ba ki longïing kiba shah beh shnong ki dei kiba bun na ki jaitbynriew Muslim kiba kren Bengali.
Naduh ba u Myntri Rangbah ka Jylla u Himanta Biswa Sarma u la shimti ïa ka shuki ha u snem 2021, ka jylla ka la ïohi ïa ka jingpynkynriah ïa ki briew ban pynduh ïa kaei kaba ka sorkar ka batai kum ki “jingwan rung tuh,” kiba bun na ki ki la ktah ïa ki paidbah Muslim kiba kren Bengali.
Dang shen u Sarma u la pynpaw biang ba ki jingpynkynriah kin dang ïai bteng, da kaba pynskhem ba ki “Miya ba be-aiñ” kin ym ïoh jingsuk hapoh ka sorkar jong u. Ka kyntien Miya, kaba la pyndonkam tynrai kum ka jingkren beiñ ïa ki Muslim kiba kren Bengali ha Assam, ha kine ki snem ba la dep, la shim biang da ki dkhot jong ka imlang sahlang kum ka dak jong ka jingithuh.
