Itanagar, Naiwieng:
Na ka jingbteng jong ka jingtohkit, ki pulit ki la kem ïa lai ngut ki nongtrei jong ka Saninik School, Nigolok, ha Arunachal Pradesh, ha East Siang District, halor ka jingïap jong uwei u khynnah Cadet, uba dang 12 snem ka rta, ha ka jaka jong katei ka jaka pule, ong uwei u heh pulit.
Ha ka 1 tarik Naiwieng, la pynshisha ba uwei u khynnah klas 7 u la khlad noh da kaba pynïap ïalade ha phyllaw jong ka skul. Hadien kane la ujor da ka mukotduma hapoh ka Bharatiya Nyaya Sanhita ha Ruksin Police Station.
Kine ki lai ngut ki nongtrei kiba la shah kem ki dei kiba la tip kyrteng kum u Devendra Singh , u House Master jong ka Subansiri House junior cadet wing, u Kangge Darin uba dei u House Master jong ka Subansiri House Senior Cadet Wing bad u Amar Singh Thakur uba dei u Hostel Superintendent kane ka skul.
U Superintendent of Police ka East Siang, u Pankaj Lamba, u la ïathuh ba ïa kine ki briew la kem ha ka sngi Saitjaiñ hadien ba la bishar bniah ïa ki jingïathuh jong ki nongsakhi, ki sabut ba la lap bad ki jingbud dien halor kane ka jingjia ba sngewsih.
Kane ka mukotduma ka la pynmih ïa ka jingbitar ha ka jylla baroh kawei hadien ba la mih ki khubor ba une u khynnah u la phah khubor sha ka hynmen jong u tang khyndiat por shwa ban ïap, da kaba kynnoh ba u la shah “pynshitom beiñ ha kiba la kham heh ïa u”. Ki bahaïing jong u ki la kynnoh ba une u khynnah u la shah pyndik bha bad shah pynshitom ha ka bor pyrkhat ha ka hostel jong ka skul.
Kham hashwa, ki pulit ki la kem ïa 8 ngut ki khynnah pule jong kane ka skul, baroh ki dei ki khynnah kiba dang poh rta, ha kaba ïadei bad katei ka kam bad la ïalam bishar ïa ki hakhmat ka Juvenile Justice Board.
Ïa kane ka mukotduma, kaba la mudui nyngkong kum ka jingïap bym dei kaba ïadei bad ka jingpang jingshitom, la pynkylla biang hapoh ki kyndon kiba ïadei bad ka jingkyrshan jong ka Bharatiya Nyaya Sanhita kaba thymmai hadien ba ki jinglap ba nyngkong ki la kdew sha ka jinglah ban donkti jong baroh ar kata ki khynnah pule kiba la kham san bad ki nongtrei.
Ha ka janmiet jong ka sngi Saitjaiñ, u Myntri ka tnad pule puthi ka jylla Arunachal Pradesh, u Pasang Dorjee Sona, u la leit jngoh bad u la ïakren bad ki bor pynïaid katei ka skul.
U Myntri u la bthah ïa ki bor pynïaid jong ka skul ba kin ai ka jingïatreilang kaba pura bad ki pulit ha ka jingtohkit kaba dang ïaid shakhmat.
U Myntri u la bthah shuh shuh ïa ki ban ai jingkyrshan ai jingmut mardor ïa ki samla pule kiba ïakhun pyrshah ïa ka jingshah pynmynsaw bad ban shim ïa ki lad ki lynti kiba pyrkhing, ban ïada ban pynduhjait ïa baroh ki jait jingshah lehbeiñ, ha ka met ne ha ka jingmut jingpyrkhat, hapoh ka jaka pule.
“Ka jingpynthikna ïa ka jaka kaba shngaiñ bad kaba pynroi ïa ki khun jong ngi ka long kaba ym lah ban ïa kren. Man uwei pa uwei u khynnah skul u dei hok ban nang ban tip, ban san, bad ban kiew khlem kino kino ki jingtieng jingsyier,” u la ong.
