Agartala, Naiwieng:
U Myntri Rangbah jong ka jylla Tripura u Manik Saha, u la pynbna ba ka sorkar jylla, ka dang pyndep ïa ka jingthmu ban pynjur ïa ka jingpeit bniah halor ka jingpang HIV, khamtam eh hapdeng kiba suba don ïa ka jingpang, kum shi bynta ban tehlakam ïa ki jingpang kiba ïadei bad ka jingdih drok.
Haba kren ha ka prokram jong ka Association of Surgeons of India, Tripura Chapter, u Saha u la ong ba ki ophisar bad ki kynhun wad bniah ki la trei ban ïakhun pyrshah ïa ka jingma kaba nang kiew jong ka jingkhaïi drok bad ka jingktah jong ka ïa ka koit ka khiah jong ki paidbah. “Baroh ki tip ba ka jingkit drok ka wan na Myanmar sha Tripura lyngba ka Assam bad Mizoram.Ka Tripura ka la kylla long ka lynti ïaid na ka bynta ka jingshalan tuh ïa u drok,” u la kynthoh.
U Myntri Rangbah u la pynpaw ba ka jingkurup, jingkem bad jingpynngat ha ki kam ba ïadei bad u drok ka la kiew namar ka jingpynjari aiñ kaba kham khlaiñ. U la kynthoh ïa ki seng pyrshah kiba la buh jingkylli ïa ki kam jong ka sorkar, da kaba ong, “Ïa ki drok la lap namar ka jingpyntreikam stet ba la leh da ki bor pynïaid aiñ. Ngi tip ba ka jingleh ka long kaba jem ha ka por ba ki synshar.”
