Shillong, Naiwieng 11
Ka Sorkar Jylla ka dang pyrkhat ban thaw noh da ka aiñ ban tehlakam ïa ki kam runar kiba ïadei bad ki kam menshohnoh bad men-ai-ksuid.
Haba kren sha ki lad pathai khubor ha ka Sngi Ba-ar, u nongaibuit ka tnad Social Welfare, Bah Paul Lyngdoh u la pynpaw ba kane ka dei ka kam kaba ka tnad aiñ ka hap ban pyntreikam ïa ka bor pyrkhat jong ka namar ha kawei ka liang “ngi don ïa kine ki rukom leh bapher-bapher kiba la rim bha bad ha kajuh ka por, kine kim ïahap bad ka synshar aiñ lada phi kren ïa ka aiñ”.
Katkum ka jingong jong u, ka mat ba ïadei bad ka jingdonkam ban don ïa ka aiñ ba pyrshah ïa ki kam men-ai-ksuid kan donkam ïa ka jingïamir jingmut bad ki Autonomous District Council (ADC) lem bad ka tnad aiñ jong ka Jylla.
“Kumta, ka dei ka mat kaba kongsan bha bad kaei kaba ngi ïohi haduh mynta ka long ba ka jingdon jong kum kine ki jingjia ka la nang duna ha kine ki snem bad ngi ngeit skhem ba lada donkam ïa kum kata ka aiñ, kan ym dei tang ka Sorkar Jylla, ngi don ruh ïa ki ADC kiba don ruh ïa ki tnad aiñ ha kito ki Council – ngin donkam ïa ka aiñ kaba lyngba ka jingïamir-jingmut bad ki ADC ngi lah ban wanrah ïa ka aiñ jong ka Jylla lane ki ADC hi ki don ha ka kyrdan ban thaw aiñ bad nangta lyngba ka Sorkar Jylla ban ïoh ïa ka jingmynjur jong u Lat ïa kum kine ki aiñ,” ong u Bah Paul.
Ha kajuh ka por, u la pynkynmaw ïa ka jingjia kaba dang shen ha Khliehshnong Sohra, ha kaba ki pulit mar-mar ki la leit ban ïada ïa kawei ka longïing bad ki marjan-marpa jong ki na ka jingshah bom shnong. Haba ïadei bad kane, la kem ïa 9 ngut kiba donkti bad la pynngat ïa ki hapoh ki kyndon aiñ bapher-bapher.
“Nalor kata, mar syn jia katei ka jingjia, ka tnad Social Welfare ka la shimkhia, ka la pyllait im ïa kito ki longïing, ngi la sumar ïa ki bad pyntikna ba ki don hapoh ka jingsumar ba shngaiñ jong ka tnad,” ong u Bah Paul haba pynbna ba ki lanot mynta ki la leit phai noh sha la ki ïing ki sem hadien ba ki la sngewskhem halor ka jingshngaiñ jong ki.
